32010R0838

Reglugerð framkvæmdastjórnarinnar nr. 838/2010
frá 23. september 2010 um leiðbeinandi reglur um þóknun til flutningsaðila vegna raforkuviðskipta yfir landamæri og sameiginlegrar nálgunar gagnvart flutningsgjöldum (Commission Regulation (EU) No 838/2010 of 23 September 2010 on laying down guidelines relating to inter-transmission system operator compensation and a common regulatory approach to transmission charging)

Reglugerð framkvæmdastjórnarinnar (EB) nr. 838/2010 er sett á grunni reglugerðar Evrópuþingsins og ráðsins (EB) nr. 714/2009, um skilyrði fyrir aðgangi að neti fyrir raforkuviðskipti yfir landamæri. Reglugerð (EB) nr. 714/2009 nemur úr gildi eldri reglugerð (EB) nr. 1228/2003. Reglugerð nr. 284/2010, um innleiðingu reglugerðar Evrópuþingsins og ráðsins (EB), nr. 1228/2003, um skilyrði fyrir aðgangi að neti fyrir raforkuviðskipti yfir landamæri, var sett með stoð í 45. gr. raforkulaga, nr. 65/2003. Reglugerð (EB) nr. 714/2009 er hluti af þriðja raforkupakkanum sem hefur enn sem komið er ekki verið tekinn inn í EES samninginn.
Með reglugerð framkvæmdastjórnarinnar nr. 838/2010 er kveðið á um að flutningsaðilar sem flytja raforku yfir landamæri skuli fá þóknun í samræmi við leiðbeinandi reglur sem eru fylgiskjal með reglugerðinni.
Helsta nýbreytni með reglugerð (EB) nr. 838/2010 er að eftirlitshlutverkið er komið í hendurnar á stofnun raforkueftirlitsaðila í Evrópu (ACER, „Agency for the Co-operation of Energy Regulators“), sem sett er á laggirnar með reglugerð (EB) nr. 713/2009, en það var áður í höndum ERGEG („The European Regulators Group for Electricity and Gas“).
Reglugerð Evrópuþingsins og ráðsins (EB) nr. 1228/2003 var innleidd í íslenskan landsrétt að kröfu ESA, án þess að hafa raunverulega þýðingu miðað við núverandi fyrirkomulag raforkumála á Íslandi, þar sem landið er enn án tengingar við raforkukerfi Evrópu. Reglugerð (EB) nr. 714/2009 verður innleidd í íslenskan landsrétt þegar hún verður tekin inn í EES samninginn ásamt öðrum gerðum þriðja raforkupakkans.
Með vísan til framangreinds er fyrirséð að reglugerð framkvæmdastjórnarinnar nr. 838/2010 verði innleidd í íslenskan landsrétt með útgáfu reglugerðar sem hefur lagastoð í raforkulögum nr. 65/2003. Reglugerðin mun ekki hafa þýðingu á Íslandi svo framarlega sem raforkukerfi landsins sé ótengt öðrum löndum á hinu evrópska efnahagssvæði.