32016R2292

Reglugerðin sem hér er til umfjöllunar kveður á um vegið meðaltal hámarkslúkningarverðs í farsímanetum fyrir reikiþjónustu innan Evrópusambandsins og byggir á reglugerð Evrópuþingsins og Ráðsins nr. 531/2012 um alþjóðlegt reiki á farnetskerfum innan Evrópusambandsins.
Með reglugerð Evrópusambandsins nr. 2015/2120, sem einnig byggir á heimild í reglugerð 531/2012, var ákveðið að framkvæmdastjórn ESB myndi árlega ákvarða hámarkslúkningarverði fyrir reikiþjónustu innan EES-svæðisins og skyldi það byggt á vegnu meðaltali lúkningargjalda fyrir slíka þjónustu, þar til nýtt gjaldskrárfyrirkomulag yrði tekið í notkun, þ.e. Roam like Home.
Með lúkningarverði er átt við það gjald sem fjarskiptafyrirtæki í því landi sem símtal á sér stað í má leggja á gjaldanda frá öðru ríki til viðbótar þeirri gjaldskrá sem þar gildir. Gjaldið er síðan innheimt af þeim sem hringir fyrir milligöngu þess fjarskiptafyrirtækis sem hann á viðskipti við í sínu heimalandi. Lúkningarverð hafa verið nefnd reikigjöld í almennu tali.
Í samræmi við reglugerðina og fyrri reglugerðir sama efnis hafa reikigjöld, þ.e. lúkningarverðið, verið lækkuð með því að setja á þau hámark á undanförnum árum. Í þessari tilteknu reglugerð er gert ráð fyrir enn einu lækkunarþrepi reikigjalda sem tekur gildi þann 1. febrúar 2016. Þann 30. júní 2017 falla reikigjöld síðan niður að fullu og gildir þá innanlands gjaldskrá þess ríkis sem símtal er hafið í án nokkurra viðbótargjalda. Þessi nýja ákvörðun um hámarkslúkningarverð leysir af hólmi fyrri ákvörðun, sbr. innleiðingarreglugerð ESB nr. 2015/2352.
Upphæð lúkningarverðsins á að byggja á vegnu meðaltali hámarkslúkningarverðs í farsímanetum fyrir reikiþjónustu innan sambandsins og á framkvæmdastjórnin að reikna það út og taka um það ákvörðun og liggur sá útreikningur nú fyrir.