32017R0815

Almennt
Með reglugerð þessari taka gildi tilteknar breytingar á framkvæmdarreglugerð framkvæmdastjórnarinnar (ESB) 2015/1998 um ítarlegar ráðstafanir til að framfylgja sameiginlegum grunnkröfum um flugvernd. Meðal annars er um að ræða breytingar í því skyni að tryggja skýrleika, auka sveigjanleika og auðvelda samræmda beitingu reglnanna. Ekki er um að ræða meiri háttar efnisbreytingar.
• Verið er að breyta ákvæðum um:
• Flugvernd á flugvöllum og vernd loftfara
• Skimun vökva, úðaefna og gels,
• Kröfur í tengslum við lestarfarangur
• Kröfur í tengslum við ákvæði um farm, póst og birgðir til notkunar um borð í flugvélum.
• Ráðningu og þjálfun starfsfólks
• Flugverndarbúnað.
• Dýra með starfstengt hlutverk.
• Krafna til aðgangsheimilda ökutækja
Þá er krafa um viðkvæmustu haftasvæði flugverndar á flugvöllum nú sett við flugvelli þar sem meira en 60 manns hafa útgefin flugvallarskilríki í stað 40 manns áður.
Nánari umfjöllun um tilteknar breytingar.
Breytingar á kafla 3 um vernd loftfara felast m.a. í skýrari leiðbeiningum um leit í loftförum og hvað telst til hluta sem ekki má fara með um borð.
Breytingar á kafla 4 um skimun vökva, úðaefna og gels felast m.a í því að viðkomandi yfirvald, þ.e. Samgöngustofa, getur skilgreint tiltekna flokka efna sem skima þarf eða undanskilja má skimun.
Breytingar á kafla 5 um lestarfarangur felast í því að kveðið er á um að það sé ábyrgð flugrekanda að sjá til þess að farþegum sé kunnugt um reglur um hluti sem bannað er að hafa um borð.
Breytingar á kafla 6 um farm og póst. Helstu breytingar í kaflanum eru á ákvæðum um ábyrgð aðila og skráningu farms auk þess sem gerðar eru auknar kröfur til þekktra sendenda. Skráðir sendendur falla af lista eftir fjögur ár. Viðurkenndir umboðsaðilar, regulated agents, mega ekki frá gildistöku reglugerðarinnar tilnefna skráða sendendur, account consigner. Skráðir sendendur sem hlotið hafa tilnefningu fyrir gildistöku reglugerðarinnar halda tilnefningunni í síðasta lagi til og með 30. júní 2021, og skulu þeir hafa möguleika á því að fá stöðu viðurkennds umboðsaðila eða þekkts sendanda.
Einnig hafa bæst við ítarlegri ákvæði um ACC3 aðila.
Breytingar á 8. kafla, birgðir til notkunar um borð. Gerð er strangari krafa um hraða afgreiðslu viðkomandi yfirvalds og skráningu viðurkennds birgis í evrópskan gagnagrunn, Union database.
Breytingar á 11. kafla um kröfur um ráðningu og þjálfun starfsfólks. Breytingarnar felast aðallega í viðbótum við nokkrar greinar þar sem fjallað er um þjálfunarkröfur. Þá hefur viðhengi 11-A independence declaration – EU aviation security validator verið endurbætt.
Breytingar á 12. kafla um flugverndarbúnað. Breytingarnar eru minni háttar en með þeim er m.a. fellt út úrelt ákvæði.
Þau áhrif sem reglugerðin kemur til með að hafa hér á landi eru helst þau sem að framan er lýst um skráða sendendur. Nokkrir tugir aðila hafa þá stöðu hérlendis, þ.á.m. fyrirtæki í fiskverkun. Þau þurfa annaðhvort að sæta því að vörur þeirra séu skimaðar eða fá stöðu þekktra sendenda.
Á grundvelli reglugerðarinnar þarf Samgöngustofa að endurskoða verklagsreglur og handbækur. Þá þurfa aðilar sem viðhafa flugverndarráðstafanir að breyta verklagi sínu og þarf þjálfun þeirra að taka mið af breytingunum. Þá þarf Samgöngustofa á grundvelli breytinga 11. kafla að endurvotta viðurkennda leiðbeinendur sem hlutu vottun fyrir meira en fimm árum.