Tilmæli A1 um leiðbeiningar varðandi útgáfu A1 vottorðsins. - 32018H0529(01)

Mælt er með því að bætt sé við þáttum til að auðvelda að unnt sé að staðreyna gildi vottorðsins. Þegar vottorðið er gefið út rafrænt er mælt með raðnúmeri eða einkennisnúmeri á hverri blaðsíðu. Ef vottorðið er gefið út handvirkt ætti textinn að vera á báðum hliðum hverrar síðu og síðurnar heftar saman á þann hátt að erfitt sé að aðskilja þær. Ennfremur er mælt með því að útgefin A1 vottorð séu skráð á þann hátt að einfalt og fljótlegt sé að sannreyna gildi þeirra. Mælt er með því að aðildarríkin upplýsi framkvæmdaráðið um samræmingu almannatryggingakerfa um það hvað aðferð stofnanir þeirra viðhafi við útgáfu vottorða A1 og að sendinefndir ríkjanna hjá framkvæmdaráðinu deili þeim upplýsingum til eftirlitsstofnana sinna. Áður en vottorð A1 er gefið út er mælt með því að viðkomandi stofnanir meti allar upplýsingar sem máli skipta, hvort heldur er með opinberum gögnum eða með því að óska eftir því við umsækjandann að hann leggi fram nauðsynlegar upplýsingar. Stofnunum til leiðbeiningar hefur verið útbúið staðlað yfirlit, sem er ekki tæmandi, yfir sameiginlegar sem og sérhæfðar spurningar sem eiga við um hin ýmsu ákvæði reglugerðar (EB) nr. 883/2004 og er það fylgiskjal með tilmælunum. Aðlaga má spurningarnar eftir því sem við á í hverju máli um sig. Þá á að vera ljóst af umsóknareyðublöðunum að umsækjandinn lýsi því yfir að hann/hún hafi svarað öllum spurningunum rétt og eftir bestu getu og að viðkomandi sé ljóst að eftirlit geti leitt til þess að vottorðið verði fellt úr gildi og afturkallað með afturvirkum hætti. Þá er mælt með því að þar til bærar stofnanir hafi upplýsingar um útgefin A1 vottorð aðgengilegar, helst í rafrænum gagnagrunni. Stofnanirnar ættu að tilkynna hver annarri í gegnum rafræna kerfið um skipti á tryggingaupplýsingum (EESSI) um allar ákvarðanir sem teknar eru varðandi að hvaða löggjöf gildi ef um starfsemi er að ræða í öðru aðildarríki, í samræmi við 1. mgr. 15. gr. rg. (EB) 987/2009.