Breytingar á hjóð- og myndmiðlatilskipun ESB - 32018L1808

Svokallaðar myndefnisveitur (eða mynddeilisíður, e. video sharing platform) falla undir fjölmiðlalög jafnvel þótt þær séu ekki skilgreindar sem fjölmiðlar. Um er að ræða aðila eins og YouTube, Facebook, Instagram o.fl.
Auk reglna um aðferðir til að ákveða staðfestu þessara aðila, þ.e. undir lögsögu hvaða ríkis innan EES svæðisins þeir heyra, þá eru ítarlegar reglur um þær „viðeigandi ráðstafanir“ sem þessir aðilar þurfa að gera til að vernda börn frá efni og notendaframleiddu efni sem getur haft skaðvænleg áhrif á líkamlegan, andlegan eða siðferðislegan þroska þeirra. Þá verður óheimilt að dreifa efni sem hvetur til ofbeldis, haturs og refsiverðs verknaðar, og er hvatning til hryðjuverka og efni sem lýtur að kynþátta- og útlendingahatri sérstaklega tilgreint. Að sama skapi er skerpt á sambærilegum reglum sem gilda fyrir fjölmiðla.
Ákvæði um upprunaland og hvernig skuli bregðast við efni sem sjónvarpað er frá einu ríki en er beint til notenda í öðru ríki hafa verið endurskoðuð með tilliti til þess að það ríki sem efninu er beint að og sem telur að efnið brjóti gróflega gegn lögum þess, geti stöðvað slíkar útsendingar eða krafist þess að upprunaríkið grípi til viðeigandi aðgerða.
Gerð verður krafa um að 30% af framboði myndefnis eftir pöntun verði evrópsk verk. Þá verða auglýsingareglur rýmkaðar þannig að hámark auglýsinga verður 20% á tilteknum tímabilum en ekki bundið við 20% á klukkustund eins og nú gildir. Aðrar breytingar eru minni háttar.