Framkvæmdarákvörðun framkvæmdastjórnarinnar (ESB) 2019/1885 um reglur, reiknireglur, sannprófun og skýrslugjöf um urðun heimilisúrgangs sem mælt er fyrir um í tilskipun ráðsins 1999/31/EB og um niðurfellingu á ákvörðun 2000/738/EB - 32019D1885

Í tilskipun ráðsins 1999/31 er kveðið á um ráðstafanir sem miða að því að draga úr urðun og stuðla að endurvinnslu og annars konar endurnýtingu. Í breytingum á Evrópulöggjöf er varðar úrgang sem tóku gildi í Evrópusambandinu árið 2018 og höfðu þann megintilgang að innleiða hringrásarhagkerfi innan sambandsins voru gerðar breytingar á tilskipun 1999/31/EB um urðun. Tilskipunin er innleidd með reglugerð 738/2003 um urðun úrgangs. Í breytingunum er meðal annars sett fram nýtt markmið fyrir urðun heimilisúrgangs sem skyldar ríki til að tryggja að að hámarki 10% af heimilisúrgangi fari í urðun árið 2035. Í framhaldi af nýju markmiði var framkvæmdastjórn ESB gert að mæla frekar fyrir um reglur við útreikninga og við skýrslugjöf aðildarríkjanna.

Ákvörðun framkvæmdastjórnarinnar (ESB) 2019/1885 um reglur, reiknireglur, sannprófun og skýrslugjöf um urðun heimilisúrgangs, sem hér er til umfjöllunar, tekur á framangreindum skyldum með nýrri ákvörðun og með niðurfellingu fyrri ákvarðana sem tóku á aðferðarfræði við útreikninga er snúa að því að uppfylla markmið sambandsins. Með þessu er aðferðafræði við útreikninga uppfærð til samræmingar og til þess að tölfræðin endurspegli í auknum mæli raunverulegar meðhöndlunarleiðir heimilisúrgangs.

Í ákvörðuninni eru settar fram skilgreiningar á því hvað skuli teljast til urðaðs úrgangs og fjallar meðal annars um að urðað magn skuli ekki leiðrétt með hliðsjón af rakainnihaldi úrgangs,og að urðað magn skuli taka tillit til úrgangsleifa frá meðhöndlun úrgangs, þ.e. flokkun, forvinnslu, endurvinnslu og förgun/brennslu, sem enda í urðun óháð því hvort að úrgangurinn er urðaður í upprunalandi eða móttökulandi.

Skýrslum skal skilað í samræmi við viðauka ákvörðunarinnar árlega, í síðasta lagi 18 mánuðum eftir að bókhaldsári lýkur.

Viðauki I
Í viðauka I er sett fram einföld tafla sem notast á við til að skila upplýsingum um urðun á lífbrjótanlegum heimilisúrgangi. Einnig er sett fram eyðublað fyrir gerð skýrslu um gæði gagna er snýr að urðun lífbrjótanlegs úrgangs.

Viðauki II
Í viðauka II er sett fram einföld tafla sem notast á við til að skila upplýsingum um urðun heimilisúrgangs. Einnig er sett fram eyðublað fyrir gerð skýrslu um gæði gagna er snýr að urðun heimilisúrgangs.