32019R1122

Commission Delegated Regulation (EU) 2019/1122 of 12 March 2019 supplementing Directive 2003/87/EC of the European Parliament and of the Council as regards the functioning of the Union Registry
  • Tillaga sem gæti verið EES-tæk

  • Gerð í skoðun hjá EES-EFTA ríkjunum

  • Drög að ákvörðun sameiginlegu nefndarinnar í skoðun

  • Ákvörðun sameiginlegu nefndarinnar samþykkt en hefur ekki öðlast gildi

  • Tekin upp í EES-samninginn og í gildi

  • Tekin upp í EES-samninginn en ekki lengur í gildi

Staða og svið tillögu/gerðar

Staða tillögu/gerðar ESB gerð sem hefur verið tekin upp í EES-samninginn og er í gildi
Svið (EES-samningur, viðauki) 20 Umhverfismál, 20.03 Loft
Ákvörðun sameiginlegu nefndarinnar (JCD) 126/2021
Samþykktardagur ákvörðunar sameiginlegu nefndarinnar
Þennan dag skulu skilyrði uppfyllt á EES-svæðinu
Staðfestur gildistökudagur
Í gildi á EES-svæðinu

Almennar upplýsingar

Útdráttur

Skrá sambandsins (ESB), öðru nafni skráningarkerfið, var upphaflega stofnað með reglugerð Framkvæmdastjórnarinnar (ESB) nr. 920/2010 (reglugerð um skráningarkerfi). Reglugerð framkvæmdastjórnarinnar (ESB) nr. 389/2013 felldi úr gildi reglugerð (ESB) nr. 920/2010 og setti fram kröfur varðandi rekstur og viðhald kerfisins fyrir 3. viðskiptatímabil viðskiptakerfis ESB með losunarheimildir (ETS) sem hófst 1. janúar 2013 (3. tímabilið) og síðari tímabil, varðandi óháða viðskiptaskrá sem kveðið er á um í 1. mgr. 20. gr. tilskipunar 2003/87/EB og um skrár sem kveðið er á um í 6. gr. ákvörðunar Evrópuþingsins og ráðsins nr. 280/2004 / EB. Nýtt viðskiptatímabil ETS, 4. tímabilið, mun hefjast árið 2021. Því þarf að aðlaga skráningarkerfið að nýjum reglum fyrir 4. tímabilið, þar sem nauðsynlegt er að tryggja að innleiðing og virkni skráningarkerfisins uppfylli þær kröfur sem settar eru fram fyrir tímabilið.

Nánari efnisumfjöllun

Tilskipun 2003/87/EB er lagagrundvöllur skráningarkerfisreglugerðarinnar og var henni breytt með reglugerð (ESB) 2017/2392 og tilskipun (ESB) 2018/410. Þær breytingar verða að endurspeglast í þeim reglum sem gilda innan skráningarkerfisins og því verður ný skráningarkerfisreglugerð innleidd sem framseld gerð.

Innihald reglugerðarinnar
Reglugerð (ESB) 2019/1122 inniheldur ýmsar almennar breytingar á reglum um skrá Sambandsins sem margar eru gerðar í þeim tilgangi að einfalda þær reglur sem að gilda um Skráningarkerfið. Þær breytingar eru m.a. gerðar til að draga úr stjórnsýsluálagi að því marki sem unnt er og einfalda viðmót kerfisins fyrir reikningshafa. Við þá vinnu var hefur frá árinu 2017 verið haft samráð við landsstjórnendur kerfisins, þar á meðal Ísland. Ýmsar fleiri breytingar koma þó til vegna breytinga á tengdum tilskipunum og reglugerðum sem nauðsynlegt er að innleiða í reglugerð um skrá Sambandsins. Notkun alþjóðlegra eininga í viðskiptakerfinu verður ekki möguleg á 4. viðskiptatímabilinu skv. tilskipun (ESB) 2018/410, og því verður ekki heimilt að hafa alþjóðlegar inneignir á ETS reikningum. Að auki verða þær losunarheimildir sem viðurkenndar eru í samræmi við kröfur tilskipunar 2003/87/EB nú flokkaðar sem fjármálagerningur samkvæmt tilskipun Evrópuþingsins og ráðsins 2014/65/ESB, og því þarf að samræma reglurnar um skrá Sambandsins við þær kröfur löggjafar á fjármálamarkaði, einkum með því að tryggja að viðeigandi upplýsingar séu veittar. Samkvæmt sömu tilskipun (2014/65/ESB) og reglugerð Evrópuþingsins og ráðsins (ESB) nr. 600/2014 skal auðkenna fjármálagerninga með alþjóðlegum verðbréfaauðkennisnúmerum (ISIN- kóða) sem skilgreindir eru í ISO 6166. Til að auðvelda uppfyllingu tilkynningaskyldu ættu ISIN-kóðarnir fyrir losunarheimildir að birtast í skrá Sambandsins.

Landsstjórnendur, miðlægi stjórnandinn og framkvæmdastjórnin þurfa nú að fara eftir lögum um vernd einstaklinga með tilliti til persónuverndarupplýsinga og um frjálsan flutning slíkra gagna í samræmi við reglugerð (ESB) 2016/679 (almenna persónuverndarreglugerðin) og reglugerð (ESB) 2018/1725 (vinnsla persónuupplýsinga), og því tekur þessi reglugerð einnig mið af þeim skyldum.

Flugrekendur og rekstraraðilar í viðskiptakerfinu mega ekki nota losunarheimildir sem gefnar eru út af aðildarríki sem hefur tilkynnt Evrópuráðinu um áform sín um að víkja úr sambandinu skv. 50.gr. sáttmálans um Evrópusambandið, og hafa því reglur varðandi slík áform verið settar inn í þessa reglugerð.

Öllum aðgerðum sem krafist er í tengslum við 3. viðskiptatímabil viðskiptakerfisins fyrir árin 2013–2020 ætti að vera lokið í samræmi við reglugerð (ESB) nr. 389/2013. Þar sem tilskipun 2003/87/EB heimilaði notkun alþjóðlegra eininga sem stofnað var til í tengslum við Kýótó-bókunina, gildir sú reglugerð áfram um þær aðgerðir. Til þess að ná fram skýrleika um hvaða reglur gilda um aðgerðir tengdar 3. viðskiptatímabilinu í tengslum við tilskipun 2003/87/EB annars vegar, og reglur sem gilda um aðgerðir tengdar 4. viðskiptatímabilinu skv. tilskipun 2003/87/EB sem breytt var með tilskipun (ESB) 2018/410 hins vegar, mun gildissvið þessara ákvæða reglugerðar (ESB) nr. 389/2013 halda áfram að gilda eftir gildistöku þessarar reglugerðar vegna aðgerða sem tengjast 3. viðskiptatímabilinu, en takmarkast við þann tilgang. Kýótó-einingar mega vera á viðskiptakerfisreikningum í skrá Sambandsins til 1. júlí 2023. Eftir það skal miðlægi stjórnandinn gefa út lista yfir þá viðskiptakerfisreikninga sem innihalda Kýótó-einingar og reikningshafar skulu tilgreina Kýótó-reikning sem flytja skuli einingarnar á. Ef ekki er brugðist við þeirri beiðni innan 40 virkra daga skulu þessar einingar vera færðar yfir á landsbundinn Kýótó-reikning eða reikning skilgreindan í landslögum.
Reglugerð (ESB) nr. 389/2013 skal halda áfram að gilda til 1. janúar 2026 varðandi allar aðgerðir sem krafist er í tengslum við viðskiptatímabilið milli 2013 og 2020, til annars skuldbindingartímabils Kyoto-bókunarinnar og til uppfyllingartímabilsins eins og það er skilgreint í 30. mgr. 3. gr. þeirrar reglugerðar.

Helstu breytingar
Reglugerðin inniheldur margar breytingar á reglugerð (ESB) nr. 389/2013, en eftirtaldar breytingar vega þyngst og munu hafa áhrif bæði á landsstjórnendur og reikningshafa.

Viðurkenndir fulltrúar.
Hver reikningur skal hafa a.m.k. tvo viðurkennda fulltrúa með eftirtalin réttindi:
1. Einn fulltrúa til að hefja ferli og annan til að samþykkja ferli.
2. Einn fulltrúa til að hefja ferli og annan sem má bæði hefja ferli og samþykkja ferli.
3. Tvo fulltrúa sem mega báðir hefja og samþykkja ferli.
Við þessa breytingu eru viðurkenndir viðbótarfulltrúar fjarlægðir úr kerfinu. Reikningshafar mega ákveða að samþykki annars viðurkennds fulltrúa sé ekki nauðsynlegt til að hefja millifærslu á reikninga sem eru á skrá yfir áreiðanlega reikninga (e. Trusted Account list).
Uppgjörsreikningur fer sjálfkrafa á skrá yfir áreiðanlega reikninga, sem þýðir að ef reikningshafi ákveður svo, er nóg að einn viðurkenndur fulltrúi sjái um uppgjör losunarheimilda.

Vottunaraðilar.
Vottunaraðilar þurfa að hafa a.m.k. einn viðurkenndan fulltrúa. Reikningur fyrir vottunaraðila fellur út og þeir verða einungis skráðir inn í kerfinu.

Staða reikninga.
Reikningur getur verið með stöðuna opinn, frystur, lokun í bið eða lokaður. Reikningar sem voru undanskildir (e. excluded) eru teknir út og í staðinn kemur „lokun í bið“. Ef reikningi hefur verið lokað er ekki hægt að opna hann aftur.
Allt sem tengist Kýótó-reikningum er tekið út úr reglugerðinni og eftir standa einungis reglur um viðskiptakerfisreikninga.
Landsstjórnendum eru gefin skýrari fyrirmæli og auknar heimildir þegar kemur að stjórnun reikninga, til dæmis við synjun þess að opna reikning.
Reglur um hvenær landsstjórnandi getur lokað reikningum er breytt, og ný grein kemur inn með heimildir til að loka reikningum og fjarlægja viðurkennda fulltrúa af reikningum að frumkvæði stjórnanda, til dæmis ef ekki eru raunhæfar líkur á frekara uppgjöri. Hafi reikningshafi verið tekinn til gjaldþrotaskipta má loka reikningi tímabundið og ef losunarheimildir eru inni á reikningnum má landsstjórnandi flytja þær yfir á annan reikning.

Tímasetningar varðandi framkvæmd millifærslna breytast.

Innleiðing tengingafyrirkomulags (e. linking arrangements)
Miðlægi stjórnandinn má stofna reikninga og ferla og fara í viðskipti og aðra starfsemi til að hrinda í framkvæmd samningum og fyrirkomulagi skv. greinum 25 og 25a í tilskipun 2003/87/EB, en þær greinar fjalla um önnur viðskiptakerfi með gróðurhúsalofttegundir og ráðstafanir þriðju ríkja til að draga úr losun gróðurhúsalofttegunda vegna flugs. Þessi ráðstöfun krefst fjölda aðlagana í reglugerðinni og tryggja þarf meðal annars viðurkenningu á losunarheimildum þriðju ríkja fyrir samræmi, að hægt sé að flytja slíkar losunarheimildir, stofna reikninga, viðskiptaferla og gera ráðstafanir ef slíku fyrirkomulagi verði slitið.

Útgáfa losunarheimilda
Losunarheimildir útgefnar frá og með 1. janúar 2021 skulu innihalda auðkenni sem sýnir á hvaða 10 ára tímabili frá og með 1. janúar 2021 þær voru stofnaðar og vera auðkenndar með ISIN kóða. Losunarheimildir aðildarríkis sem hefur tilkynnt Evrópuráðinu um áform sín um að víkja úr sambandinu skv. 50.gr. sáttmálans um Evrópusambandið skulu vera auðkenndar með landsnúmeri og ekki má nota slíkar heimildir við uppgjör losunarheimilda.

Úthlutun losunarheimilda
Settur er inn sá möguleiki að flytja losunarheimildir flugrekenda á reikninga þeirra í öðru skráningarkerfi með losunarheimildir, þar sem tengingafyrirkomulag er fyrir hendi, og öfugt. Ef losunarheimildum er of-úthlutað af því að flugrekandi eða rekstraraðili hætti starfsemi sem tengdist úthlutuninni án þess að upplýsa lögbært yfirvald, má landsstjórnandi flytja þær losunarheimildir yfir á úthlutunarreikning ESB.

Uppgjör
Ekki verður hægt að gera upp losunarheimildir sem eiga ekki að tengjast útreikningi á tölum um reglufylgni. Ef samningur er í gildi um tengingafyrirkomulag skv. 25. gr. tilskipunar 2003/87/EB skulu reglur um uppgjör einnig gilda til eininga sem gefnar eru út í því kerfi sem tengt er ETS kerfinu. Ekki verður hægt að gera upp losunarheimildir sem eru merktar landsnúmeri.

Öryggisbrot og öryggisáhætta
Frekari heimildir eru fyrir landsstjórnendur til að loka aðgangi að reikningum ef upp koma mál tengd gruni um öryggisbrot eða alvarlega áhættu tengdri skrá Sambandsins.

Samstarf við lögbær yfirvöld og tilkynning um peningaþvætti, fjármögnun hryðjuverka eða afbrot
Komið er á fót samvinnu við opinbera aðila um að koma upp verklagsreglum um fyrirbyggjandi aðgerðir gegn peningaþvætti eða fjármögnun hryðjuverka. Löggæsluyfirvöld geta farið fram á stöðvun í samræmi við landsslög. Náið samstarf skal vera með Fjármálaeftirliti og veita skal allar umbeðnar upplýsingar. Aðildarríki landsstjórnandans skal tryggja að innlendar ráðstafanir til að innleiða greinar 37, 38, 42 og 46 í tilskipun (ESB) 2015/849 um að koma í veg fyrir notkun fjármálakerfisins til peningaþvættis eða fjármögnunar hryðjuverka, gildi um landsstjórnandann. Þessar greinar fjalla um skyldu starfsmanna til að tilkynna grun um fjármálabrot til Fjármálaeftirlits, að þeir hafi þekkingu á verklagi slíkra brota og verndun þeirra starfsmanna þegar við á.

Vinnsla persónuupplýsinga
Nýjar greinar koma inn í reglugerðina í tengslum við vinnslu persónuupplýsinga. Landsstjórnendur eru álitnir ábyrgðaraðilar í skilningi 6. tölul. 3. gr. laga um persónuvernd og vinnslu persónuupplýsinga nr. 90/2018 og lúta þeirri grein.

Skráningarupplýsingar.
Fjarlægja skal persónuupplýsingar úr gögnum fimm árum eftir lokun reiknings eða loka viðskiptasambands. Í sérstökum tilfellum er heimilt að geyma þessar upplýsingar lengur.

Trúnaðarkvaðir eru skýrari, sem og þagnarskylda. Aðgangur að upplýsingum er víkkaður til þeirra lögbæru yfirvalda sem um getur í tilskipunum (ESB) 2015/849 og 2014/65 og reglugerðum nr. 596/2014 (um markaðsmisnotkun) og 713/2009 (um að koma á fót Samstarfsstofnun eftirlitsaðila á orkumarkaði).

Viðaukum er breytt í samræmi við breytingar á reglugerðinni.

Breytingar sem taka gildi frá gildistöku reglugerðarinnar

- 87. gr. reglugerðarinnar fjallar um þær breytingar á reglugerð (ESB) nr. 389/2013 sem taka gildi strax við gildistöku reglugerðarinnar. Eftirfarandi breytingar taka gildi strax:
- mgr. 7. gr um tengingafyrirkomulag í samræmi við 25. gr. tilskipunar 2003/87/EB.
- og 5. mgr. 56. gr. um losunarheimildir vegna flugheimilda flugrekenda sem hafa reikninga í öðru skráningarkerfi með losun gróðurhúsalofttegunda.
- mgr. er bætt við 67. gr um að ef að samningur er í gildi um tengingafyrirkomulag skv. 25. gr. tilskipunar 2003/87/EB skulu reglur um uppgjör einnig gilda til eininga sem gefnar eru út í því kerfi sem tengt er ETS kerfinu.
- 71. gr. breytist þannig að miðlæga stjórnandanum er heimilt að stofna reikninga og ferla og fara í viðskipti og aðra starfsemi til að hrinda í framkvæmd samningum og fyrirkomulagi skv. greinum 25 og 25a í tilskipun 2003/87/EB, en þær greinar fjalla um önnur viðskiptakerfi með gróðurhúsalofttegundir og ráðstafanir þriðju ríkja til að draga úr losun gróðurhúsalofttegunda vegna flugs.
- 3. mgr. er bætt við 105. gr. um að staðlar sem þróaðir eru í samræmi við samninga um tengingafyrirkomulag skulu vera í samræmi við upplýsingaskipta- og tæknilegar forskriftir sem koma fram í reglugerð (ESB) nr. 389/2013.
- 108. gr. er skipt út fyrir ítarlegri reglur um meðferð persónuupplýsinga.
- Í viðauka XIV er punkti 4a bætt við um upplýsingar sem birtar skulu vera um tengingasamninga í gildi, það er, upplýsingar um eignarhluta losunarheimilda sem gefnar eru út í tengdu viðskiptakerfi með losun á öllum reikningum í skrá sambandsins, fjölda losunarheimilda sem gefnar eru út í tengdu viðskiptakerfi með losun en notaðar fyrir reglufylgni innan ETS kerfisins, summu losunarheimilda sem gefnar voru út í tengdu viðskiptakerfi með losun og voru fluttar á reikninga í skrá Sambandsins á fyrra almanaksári og summu losunarheimilda sem voru færðar á reikninga í tengdu viðskiptakerfi með losun á fyrra almanaksári.

Staða innan stjórnsýslunnar

Stofnun hefur lokið yfirferð
Þörf á aðlögun í ákvörðun sameiginlegu nefndarinnar Ekki þörf á aðlögun
Fagráðuneyti hefur lokið vinnu við upplýsingablað og samþykkir drög að ákvörðun sameiginlegu nefndarinnar
Utanríkisráðuneyti hefur veitt samþykki fyrir því að drög að ákvörðun sameiginlegu nefndarinnar séu send til ESB

Innleiðing

Innleiðing Reglugerð - breyting eða ný
Tilgreinið hvaða lög eða reglugerð þarf að setja eða breyta Reglugerð þessi tekur gildi 1. janúar 2021. Á sama tíma fellur reglugerð (ESB) nr. 389/2013 um skráningarkerfi úr gildi en ákvæði reglugerðar ESB nr. 389/2013 sem fjalla aðgerðir sem krafist er í tengslum við viðskiptatímabilið á milli 2013 og 2020 og aðgerðir sem varða seinna skuldbindingartímabil Kýótó-bókunarinnar og um, framfylgnitímabil eins og það er skilgreint í 30.mgr. 3. gr. þeirrar reglugerðar, gilda til 1. Janúar 2026.
Kýótó-einingar mega vera á viðskiptakerfisreikningum í skrá Sambandsins til 1. júlí 2023.
Lagastoð reglugerðarinnar er að finna í 22. gr. g. laga nr. 70/2012 um loftslagsmál.


Breytingar samkvæmt 87. gr. reglugerðarinnar þarf að innleiða í núgildandi reglugerð (ESB) nr. 389/2013 um skráningarkerfi sem allra fyrst og gildir sú reglugerð þá með breytingum til 1. janúar 2021 og ákvæði reglugerðar nr. 389/2013 um aðgerðir sem krafist er í tengslum við viðskiptatímabilið á milli 2013 og 2020 og aðgerðir sem varða seinna skuldbindingartímabil Kýótó-bókunarinnar og um, framfylgnitímabil eins og það er skilgreint í 30.mgr. 3. gr. þeirrar reglugerðar, gilda til 1. janúar 2026.
Lagastoð í lögum nr. 70/2012 um loftslagsmál.
Staða innleiðingarvinnu Innleiðing ekki hafin

Áhrif

Áætlaður kostnaður hins opinbera Aukakostnaður
Nánari útskýring á kostnaði, þ.á.m. á hvern hann fellur Kostnaðarmat þetta er sameiginlegt fyrir greiningu á reglugerðum 2019/1122 og 2019/1124.

Í dag eru 32% stöðugildi nýtt í verkefni sem tengjast skráningarkerfinu eins og sjá má í verkbókhaldi Umhverfisstofnunar. Reynsla síðustu ára hefur sýnt að það er alls ekki nægjanlegt og verkefni í tengslum við skráningarkerfið hafa setið á hakanum. Dæmi um það er dýpri skilningur á virkni kerfisins, tegundum losunarheimilda og mismunandi reikningum í kerfinu, úrvinnsla athugasemda frá úttektaraðilum loftslagssamnings S.þ., auk vinnslu við gerð og innleiðingu verkferla. Auk þess má nefna að í upphafi þriðja viðskiptatímabilsins var gert ráð fyrir frekari sértekjum vegna fjölda flugrekenda í kerfinu. Umhverfisstofnun hefur hins vegar ekki fengið umræddar sértekjur vegna takmarkaðs gildissviðs í flugi frá og með 2013 og er viðbótarfjárveiting því nauðsynleg til þess að brúa það bil.

Þó reglugerð 2019/1122 miði að því að minnka stjórnsýslulega byrði þá gagnast einföldunin fyrst og fremst reikningshöfum en ekki stjórnvöldum. Hvað varðar vinnu stjórnvalda þá mun sjálf innleiðingin og ákvæði þessarar reglugerðar kalla á aukna mannmánuði vegna aukinnar eftirfylgni, flóknara uppgjörs, vinnu við að koma á fót og viðhalda samstarfi viðeigandi stofnana er varðar fjármálagjörninga og viðlíka sem óháð er stjórnsýslunni sjálfri. Stjórnsýsluvinnan mun jafnframt aukast við afgreiðslu erinda, framkvæmd aðgerða í kerfinu, upplýsingagjöf, fræðslu og samskipti við kerfið, erlend ríki, rekstraraðila og aðrar stofnanir.

Eins og áður var minnst á er ein af viðamiklu breytingunum sem reglugerðin felur í sér sú að nýjar greinar gera auknar kröfur á kerfið í tengslum við persónuverndarlög, samstarf við Fjármálaeftirlitið og geymslu gagna. Að einhverju leyti verður ákveðin samlegð með þeim verkefnum sem unnið er að nú þegar, en að öðru leyti eru að bætast við alveg ný verkefni sem eru annars eðlis og krefjast fleiri mannmánaða. Ljóst er að fara þarf í talsverðar breytingar á viðmóti skráningarkerfisins sjálfs, sem þegar eru hafnar, og landsstjórnendur þurfa að kynna sér þessar breytingar mjög vel og vera í stakk búnir til að miðla þeim upplýsingum áfram til reikningshafa. Með breytingunum verða losunarheimildir í fyrsta sinn skilgreindar sem fjármálagerningar sem krefst þess að þróaðir verði nýir samvinnuferlar með Fjármálaeftirlitinu auk þess sem nýjar reglur um persónuupplýsingar í tengslum við gildandi persónuverndarlöggjöf munu kalla á rýni á verklagi.

Önnur viðamikil breyting í tengslum við innleiðingu reglugerðar (ESB) 2019/1124 er að þar kemur inn nýr kafli í kjölfar reglugerðar Evrópuþingsins og ráðsins (ESB) 2018/842 (Effort Sharing Regulation (ESR)) um bindandi, árlegan samdrátt aðildarríkjanna á losun gróðurhúsalofttegunda á árunum 2021 til 2030 sem framlag til loftslagsaðgerða til að uppfylla skuldbindingar samkvæmt Parísarsáttmálanum og um breytingu á reglugerð Evrópuþingsins og ráðsins (ESB) nr. 525/2013. Hingað til hefur Umhverfisstofnun ekki framkvæmt árlegt uppgjör eins og önnur aðildarríki gera, heldur einungis í lok hvers skuldbindingartímabils Kýótó bókunarinnar. Með þessum breytingum er tengjast ESR mun formlegt uppgjör fara fram árin 2027 og 2032 en gilda fyrir einungis eitt ár í einu og árlega verður því að fara fram yfirferð á losunarbókhaldinu innanhúss. Þó enn sé að einhverju leyti óvissa um hvaða áhrif innleiðing ESR muni hafa á skráningarkerfið er ljóst að hún mun kalla á aukna mannmánuði, m.a. vegna árlegrar skoðunar, aukinnar eftirfylgni og flóknari útreikninga og aðferða.

Til viðbótar skal nefna að ef til tengingafyrirkomulags kemur, t.d. ef skráningarkerfi CORSIA verður tengt við skrá Sambandsins, er ljóst að aukin vinna mun skapast við það fyrirkomulag.

Gera má ráð fyrir viðbótar fundum og vinnustofum vegna innleiðingar á reglugerð 2019/1124. Ekki er gert ráð fyrir viðbótar fundum vegna innleiðingar á reglugerð 2019/1122, nema einstaka vinnustofum þar sem vinna við þá innleiðingu fer í gegnum skráningarkerfishóp Expert Group on Climate Change Policy.
Ekki er gert ráð fyrir aðkeyptri vinnu vegna innleiðingu reglugerðanna.

Samkvæmt framangreindu má gera ráð fyrir að þörf skapist fyrir hálft stöðugildi til viðbótar vegna breytinga í skráningarkerfinu, svo að heilt stöðugildi verði eyrnamerkt kerfinu.

Samantekt:

1. Vinna sem er hafin 2019 (Umhverfisstofnun tekur þennan kostnað á sig):
a) Greining reglugerða og innleiðing í íslensk lög.
b) Kynning á breyttum reglum og viðmóti fyrir notendur kerfisins.

2. Vinna sem mun hefjast fyrir 2021 (Umhverfisstofnun tekur þennan kostnað á sig):
a) Vinna við aðlögun að nýjum reglum og verkferlum að því marki sem unnt er, m.a. við að skýra óvissuþætti sem enn eru til staðar.
b) Samstarf við Fjármálaeftirlitið (FME) og önnur lögbær yfirvöld:
- Full samvinna við yfirvöld við að koma á fót kerfi til að koma í veg fyrir peningaþvætti og fjármögnun hryðjuverka.
- Fundir og annað náið samstarf.
- Gerð verkferla á milli stjórnvalda.
- Upplýsingagjöf að eigin frumkvæði og að frumkvæði FME.
c) Aðlögun að vinnslu persónuupplýsinga.


2. Aukin vinna frá 2021 (3 mannmánuðir):
a) Þriðja tímabil ETS-kerfisins klárast og fjórða tímabilið hefst.
b) Uppgjör 2. tímabils Kýótó-bókunarinnar. Frágangur Kýótó-reikninga og eininga.
c) Vinna vegna tengingafyrirkomulags ef af því verður.
d) Áframhaldandi samstarf með viðeigandi stofnunum vegna skilgreininga losunarheimilda sem fjármálagerninga.

4. Vinna vegna ESR (3 mannmánuðir):
a) Flóknara uppgjör vegna ESR (Effort Sharing Regulation 2018/842) sem verið er að innleiða í EES-samninginn, til dæmis vegna sveigjanleikaákvæðisins og nýrra reglna um lántöku (e. borrowing) og að halda einingum til haga (e. banking).þessi verkefni eru önnur en þau sem eru metin í greiningu sem snýr að reglugerð 2018/842.
b) Árleg yfirferð á niðurstöðum losunarbókhalds sem fyrirvari fyrir uppgjörsár.
c) Uppgjörin verða árin 2027 og 2032 en gilda fyrir einungis eitt ár í einu.
d) Aukin þörf á eftirfylgni vegna reglugerðar 2019/1124
e) Frekari vinna við innleiðingu á reglugerð 2019/1124 er ekki orðin ljós eins og stendur


Mannaflaþörf Umhverfisstofnunar vegna innleiðingar á þessum reglugerðum:
- 2021-2030: 6 mannmánuðir á ári, samtals 5.950.000 kr. á ári á verðlagi 2019.


Framangreint kostnaðarmat er sett fram með fyrirvara um frekari vinnu vegna innleiðingar á reglugerð 2019/1124 og að auki ef stofnað verður til tengingafyrirkomulags.

Ábyrgðaraðilar

Ábyrgt ráðuneyti Umhverfis-, orku- og loftslagsráðuneytið
Ábyrg stofnun Umhverfisstofnun

Samþykktar gerðir birtar í Stjórnartíðindum ESB

CELEX-númer 32019R1122
Samþykktardagur hjá ESB
Samþykkt tilvísun í Stjórnartíðindi ESB OJ L 177, 2.7.2019, p. 3
Þennan dag skulu skilyrði uppfyllt í ESB

Vinnslustig (pipeline stage)

Samþykktardagur i ESB

Ákvörðun sameiginlegu nefndarinnar

Sendingardagur EFTA á drögum að ákvörðun sameiginlegu nefndarinnar til framkvæmdastjórnarinnar
Samþykktardagur
Staðfestur gildistökudagur
Tilvísun í EES-viðbæti EEA Supplement No 5, 18.1.2024, p. 65
Tilvísun í stjórnartíðindi ESB OJ L, 2024/107, 18.1.2024