32019R1123

Sú reglugerð sem hér er til greiningar var samþykkt af Framkvæmdarstjórn ESB þann 12. mars 2019. Reglugerðin inniheldur tæknilegar reglur varðandi jöfnun (e. clearing) fyrir lok síðara skuldbindingatímabils Kýótóbókunarinnar. Ísland gerði samning við Evrópusambandið og aðildarríki þess um sameiginlegar efndir á seinna skuldbindingartímabili Kýótóbókunarinnar við Rammasamning Sameinuðu Þjóðanna um loftslagsbreytingar.
Reglugerðin hefur einungis áhrif á ríki sem taka þátt í viðskiptakerfinu en eru ekki aðilar að samningi um sameiginlegar efndir (e. joint fulfillment) vegna síðara skuldbindingatímabils Kýótóbókunarinnar, þar af leiðir að reglugerð þessi gildir einungis um Noreg og Liechtenstein.

Reglugerðin tekur gildi 20 dögum eftir að hún birtist í Stjórnartíðindum Evrópusambandsins, en mun ekki eiga við fyrr en ESB hefur birt í Stjórnartíðindunum að Doha breytingin við Kýótóbókunina hafi tekið gildi, sem gerist þegar 144 ríki hafa fullgilt samninginn um síðara skuldbindingatímabil Kýótó bókunarinnar (2013-2020) (Doha breytingin). Þann 8. maí 2019 höfðu 128 ríki fullgilt samninginn.

Innihald reglugerðarinnar
Reglugerðin hefur að geyma reglur varðandi uppgjör milli ESB og ríkja sem taka þátt í ETS kerfinu en eru ekki aðilar að samkomulagi um sameiginlegar efndir á síðara skuldbindingatímabili Kýótó bókunarinnar, sem í reynd eru einungis Noregur og Liechtenstein. Þessar reglur munu vera í gildi þangað til í lok viðbótartímabilsins til að uppfylla skuldbindingar samkvæmt öðru skuldbindingartímabili Kýótóbókunarinnar sem er til 1. júlí 2023.

Við reglugerð 389/2013 um skráningarkerfi fyrir losunarheimildir bætist við grein 73h sem kemur fram með reglur fyrir millifærslur (jöfnun) á Kýótó heimildum (AAU einingum) á milli ESB, Liechtenstein og Noregs. Svokallað jöfnunargildi er reiknað út sem segir síðan til um það hver þessara þriggja aðila munu millifæra Kýótó einingar til hverra. Reikniaðferðin er mismunandi eftir því hvort um er að ræða rekstraraðila í staðbundinni starfsemi eða flugrekendur.
Ef að jöfnunargildið er jákvætt þarf miðlægi stjórnandi skráningarkerfisins að millifæra samsvarandi upphæð AAU eininga á Kýótó reikning Noregs eða Liechtenstein. Ef að jöfnunargildið er neikvætt þarf landsstjórnandi skráningarkerfisins í Noregi eða Liechtenstein að millifæra samsvarandi upphæð AAU eininga yfir á aðaljöfnunarreikning ESB (ETS Central Clearing Account).