32019R2116

Um er að ræða framkvæmdarreglugerð framkvæmdastjórnar ESB um vegið meðaltal á hámarks lúkningargjöld fyrir reikisímtöl í farnetum innan EES svæðisins.
Með gildistöku hinnar svonefndu TSM reglugerðar Evrópuþingsins og Ráðsins nr. 2015/2120/EB var kveðið á um að reikigjöld skyldu byggja á heimaverðskrá (e. Roam Like Home). Væri einstakur viðskiptavinur með mikla reikinotkun var hins vegar gert ráð fyrir því að fjarskiptafyrirtæki gætu lagt tiltekið álag á einingarverð reikisímtala slíks viðskiptavinar vegna þeirra símtala sem væru umfram eðlilega notkun. Þetta álag skyldi miða við tilteknar reikniforsendur, þ.e. vegið meðaltal á lúkningargjöldum í farsímanetum innan EES svæðisins samkvæmt ákveðnum forsendum. Í TSM reglugerðinni var framkvæmdastjórn ESB falið að reikna út þetta álag árlega, að fenginni umsögn frá BEREC (evrópskum hópi eftirlitsaðila á sviði fjarskipta).
Með þessari framkvæmdarreglugerð er verið að uppfæra útreiknað vegið meðaltal lúkningarverðs í farsíma sem skal vera 0,0079 evrusent fyrir hverja mínútu. Skal gjaldið gilda frá 1. janúar 2020 í aðildarríkjunum.
Íslensku farsímafyrirtækin hafa ekki sett ákvæði um slíkt viðbótarálag í skilmála sína vegna símtala reikiþjónustu og njóta viðskiptavinir þeirra því ætíð kjara samkvæmt heimaverðskrá á ferðalögum sínum innan EES svæðisins. Fyrirtækin verða þó að geta sett slíka skilmála um gjöld vegna reikinotkunar umfram það sem telst eðlileg notkun samkvæmt reglum um heimaverðskrá sjái þau þörf á að gæta þeirra hagsmuna sinna.
Eins og sakir standa hefur þetta hámarks viðbótarálag fyrir reikisímtöl takmarkaða þýðingu fyrir íslenskan fjarskiptamarkað. Eigi að síður er nauðsynlegt að innleiða reglugerðina þegar þar að kemur.