Opinbert eftirlit - 32019R2122

Efni:
Þessi reglugerð kemur í stað ákvæða í tilskipun 97/78/EC um undanþágur frá opinberu eftirliti á landamæraeftirlitsstöðvum fyrir vörur í persónulegum farangri ferðamanna, til neyslu af áhöfn eða farþegum um borð í flutningstækjum og smærri sendingum sem eru sendar til einstaklinga og reglna í reglugerð nr. 206/2009/EB um forvarnir gegn dýrasjúkdómum og sjúkdómsvöldum.

Þessi reglugerð leggur fram reglur um í hvaða tilfellum og gegn hvaða skilyrðum tilteknir flokkar af dýrum og vörum geta verið undanþegnir opinberu eftirliti á landamæraeftirlitsstöðvum og í hvaða tilfellum tollyfirvöld eða önnur opinber yfirvöld mega annast tiltekin eftirlitsverkefni, svo fremi að þessi verkefni falli ekki þegar undir þeirra ábyrgð.

Þessar undantekningar geta átt við í vissum tilfellum fyrir sendingar með:
• Dýr/vörur sendar í vísindatilgangi:
o Hryggleysingjar – sendingar þurfa að hafa hlotið samþykki fyrir komu og þarf að eyða eða endursenda eftir notkun. Ath. Hér er ekki ljóst hvort um ræðir lifandi eða dauð dýr, en óheimilt er að flytja inn lifandi skordýr til Íslands í samræmi við 2. málsgrein í inngangsorðum I. viðauka EES-samningsins.
Þessi undantekning á ekki við um tilteknar tegundir hryggleysingja: býflugur, hunangsflugur, lindýr og krabbadýr
• Sýni til rannsókna og greininga:
o Sendingar þurfa að hafa hlotið samþykki fyrir komu og þeim þurfa að fylgja opinber skjöl þar sem samþykkið er tilgreint
• Plöntur og afurðir í vísindatilgangi
o Þessi ákvæði eiga ekki við þar sem plöntuheilbrigðismál eru ekki innleidd í EES samningnum
• Afurðir úr dýraríkinu og samsettar afurðir ætlaðar til neyslu í flutningstækjum
o Þær mega ekki fara í land í Sambandinu nema í umflutningi milli flutningsfyrirtækja, og þá í samráði við lögbær stjórnvöld og tollayfirvöld.
• Vörur í persónlegum farangri ferðamanna:
o Afurðir úr dýraríkinu, samsettar afurðir, aukaafurðir úr dýrum eða afleiddar, plöntur, plöntuafurðir eða aðrar afurðir svo lengi sem þær séu listaðar í 1. Hluta Annex I og að samanlögð þyngd þeirra fari ekki yfir 2 kg.
o Slægðar, tilreiddar eða unnar fiskafurðir svo lengi sem að samanlögð þyngd þeirra fari ekki yfir 20 kg.
o Aðrar afurðir, þó ekki þær sem taldar eru upp í 2. Hluta Annex I, að hámarki 2 kg.
o Plöntur m. ákveðnum undantekningum
o Vörur frá AD, IS, LI, NO, SM og CH, aðrar en plöntur til útplöntunar
o Fiskafurðir frá FO og GL
o Vörur, aðrar en plöntur til útplöntunar og fiskafurðir frá FO og GL, að hámarki 10 kg.
Lögbær yfirvöld skulu hafa til sýnis veggspjöldin úr Annex II á öllum komustöðum inn í landið og mega bæta við upplýsingum úr Annex III eða sértækum upplýsingum í hverju landi. Flutningsaðilar skulu samþykkja að þessar upplýsingar séu sýnilegar á starfssvæði þeirra og skulu jafnframt draga athygli ferðamanna að þessum upplýsingum. Lögbær yfirvöld, í samráði við tollyfirvöld eða önnur yfirvöld skulu skipuleggja sértækt opinbert eftirlit með vörum í persónulegum farangri ferðamanna eftir áhættumiðuðum og árangursríkum aðferðum skv. nánari útskýringum í þessari reglugerð.

• Smærri sendingar af vörum sem eru sendar til einstaklinga og er ekki ætlunin að setja þær á markað
o Sömu skilyrði eiga við og um sendingar í farangri ferðamanna, nema í þessu tilfelli eru það póstþjónustur sem skulu draga athygli viðskiptavina sinna að gildandi reglum.
• Gæludýr
o Ath. óheimilt er að flytja inn lifandi dýr til Íslands í samræmi við 2. málsgrein í inngangsorðum I. viðauka EES-samningsins. Þetta ákvæði á því ekki við um Ísland.

Tekur gildi:
14. desember 2019, samhliða nýju eftirlitslöggjöfinni