Breyting á CRR 2021/558 - tengd STS - 32021R0558

Reglugerð (ESB) 2021/558 breytir reglugerð (ESB) nr. 575/2013 (CRR-reglugerðinni) að því er varðar aðlögun að almennum ramma fyrir verðbréfun og var samþykkt í því skyni að stuðla að efnahagsbata í kjölfar  Covid-19 heimsfaraldursins. Hún var samþykkt samhliða breytingum á verðbréfunar-reglugerð (ESB) 2017/2402, gjarnan nefnd STS-reglugerðin.   Upphafleg STS-reglugerð (ESB) 2017/2402 heimilaði eingöngu að verðbréfanir með raunverulegu framsali væru merktar sem “STS” (einföld, gagnsæ og stöðluð verðbréfun), en með reglugerð (ESB) 2021/557 um breytingu á STS-reglugerðinni var m.a. opnað á verðbréfun á efnahagsreikningi upphafsaðila, að uppfylltum nánari skilyrðum. Hún, ásamt reglugerð (ESB) 2021/558, sem hér um ræðir, miðaði sérstaklega að því að styrkja frekar getu stofnana til að veita nauðsynlegt fjármögnunarflæði til raunhagkerfisins í kjölfar COVID-19 heimsfaraldurs, á sama tíma og tryggt er að fullnægjandi varfærnisráðstafanir séu til staðar er varðveita fjármálastöðugleika.Gildissvið STS-reglugerðarinnar (2017/2402) var breytt með reglugerð (ESB) 2021/557 þannig að nái yfir svonefnda gerviverðbréfun. Þess háttar verðbréfun, á efnahagsreikningi upphafsaðila, skal uppfylla kröfur 26. gr. a.-26. gr. a. í STS-reglugerðinni m.áo.br. og tilkynna ber um gerviverðbréfun til Evrópsku verðbréfamarkaðseftirlitsstofnunarinnar (ESMA).Reglugerð (ESB) 2021/558 felur í sér markvissar breytingar á CRR vegna umræddra breytinga á STS-reglugerðinni. Hún kveður m.a. á um gerviaukaáhættuálag í tengslum við verðbréfun, þ.e. fyrirkomulag sem almennt er notað í verðbréfun tiltekinna eignaflokka af upphafsaðilum og fjárfestum til að draga annars vegar úr kostnaði við útlánavörn og hins vegar áhættu fyrir áhættuskuldbindinguna. Í stuttu máli varðar gerðin eiginfjárkröfur til fjármálafyrirtækja vegna tiltekinnar tegundar verðbréfunar og byggir á Basel III.