32015D2186

Í ákvörðun framkvæmdastjórnarinnar 2015/2186 er fjallað um að setja á fót skráarsnið fyrir skil á upplýsingum og aðgengileika upplýsinga um tóbaksvörur í samræmi við 5. mgr. 5. gr. tilskipunar 2014/40/ESB en sú tilskipun mælir fyrir um að framleiðendur og innflytjendur tóbaksvara skili inn upplýsingum um innihaldsefni og losun (emissions) tóbaksvara og rúmmál söluafurða til stjórnvalda viðkomandi aðildarríkis. Upplýsingunum á að skila áður en ný eða breytt vara kemur á markað.
Sameiginlegt rafrænt skráarsnið fyrir þessi upplýsingaskil gerir aðildarríkjum og framkvæmdastjórninni kleift að vinna úr, bera saman, greina og draga ályktanir af upplýsingunum. Gögnin hjálpa einnig við að leggja grunn að öðrum listum samkvæmt tilskipun 2014/40/ESB. Þetta tryggir samræmda framkvæmd á tilkynningarskyldum samkvæmt tilskipuninni, samræmir upplýsingar sem framleiðendur eða innflytjendur skila til aðildarríkja, dregur úr stjórnsýslulegu álagi fyrir framleiðendur, innflytjendur og eftirlitsstofnanir og auðveldar samanburð á gögnunum. Sá tæknibúnaður (tools) sem þetta sameiginlega viðmót býður upp á að að henta bæði fyrirtækjum sem eru með alhliða tölvukerfi og fyrirtækjum sem hafa ekki slík kerfi, einkum minni eða meðalstór fyrirtæki. Fyrirtæki fá auðkennisnúmer sem þau nota fyrir allar upplýsingar sem þau senda inn.
Aðildarríkjum er frjálst að hafa tæknibúnaðinn, sem notaður er til að senda inn upplýsingar samkvæmt þessari ákvörðun, aðgengilegan fyrir tilkynningar samkvæmt 19. gr. og 22. gr. tilskipunar 2014/40/ESB og til að auðvelda að senda inn aðrar upplýsingar um tóbaksvörur.
Aðildarríki bera fulla ábyrgð á söfnun og meðferð upplýsinga samkvæmt þessari ákvörðun en þau ættu að hafa þann möguleika að geyma upplýsingar sem þeim eru sendar hjá framkvæmdastjórninni. Þetta á að veita þeim tæknibúnað sem auðveldar þeim að uppfylla skyldur sínar samkvæmt 5. gr. tilskipunar 2014/40/ESB. Framkvæmdastjórnin útbýr staðlaðan þjónustusamning fyrir þessa þjónustu. Framkvæmdastjórnin á að geyma öruggt afrit af þeim upplýsingum sem koma í gegnum sameiginlega kerfið í þeim tilgangi að ná fram ákvæðum tilskipunar 2014/40.
Í þeim tilgangi að auðvelda samanburð innan sambandsins ættu aðildarríki að hvetja framleiðendur og innflytjendur til að hafa upplýsingarnar sem þau senda inn uppfærðar (up-to-date) og senda inn uppfærslur þegar við á.
Þegar framleiðendur og innflytjendur senda inn upplýsingar um vörur sem hafa sömu samsetningu og hönnun ættu þeir, í þeim mæli sem hægt er, að nota sama vöruauðkennisnúmer, óháð vörumerkinu og undirtegund eða því hvort þau eru á markaði í einu eða fleiri aðildarríki.
Æskilegt er að framkvæmdastjórnin setji reglur um meðferð trúnaðarupplýsinga til að tryggja sem best gagnsæi upplýsinga um vöru til almennings á meðan viðskiptaleyndarmál eru tryggð. Vega og meta þarf heildstætt lögmætar væntingar neytenda til að fá fullnægjandi upplýsingar um innihaldsefni í vöru sem þeir hyggjast neyta annars vegar og hagsmuni framleiðenda til að vernda uppskriftir að vörum þeirra hins vegar. Með hliðsjón af þessum andstæðu hagsmunum ættu upplýsingar sem leiða í ljós bragðefni sem notuð eru í litlum hlutföllum í vöru að vera bundnar trúnaði.
Persónuupplýsingar á að vinna í samræmi við reglur og öryggisráðstafanir samkvæmt tilskipun 95/46/EC og reglugerð (EC) nr. 45/2001.
Í viðauka með ákvörðuninni er að finna skráarsniðið.