32018R1263

Almennt: Með reglugerð 2018/644 var ætlunin að ýta undir traust neytenda á því að eiga viðskipti á netinu á milli landa. Kannanir sýndu að einungis 15% þegna Evrópusambandsins höfðu keypt vörur erlendis frá. Sambærilegar tölur fyrir verslun innanlands voru 44%. Afleiðingin var að mati framkvæmdarstjórnarinnar að innri markaðurinn virkaði ekki sem skyldi í netverslun milli landa. Jafnframt að þar með hefðu evrópskir neytendur og smásöluaðilar ekki full not af hinum sameiginlega markaði.
Með reglugerð 2018/644 var ætlunin að taka á tveimur helstu ástæðum þess að þetta ástand væri. Þær voru mikill kostnaður og skortur á trausti. Framkvæmdarstjórnin vísaði m.a. til könnunar sem gerð var þar sem fram kom að almennt var þrisvar til fjórum sinnum dýrara að senda pakka á milli landa en það var að senda sambærilegan pakka innanlands. Að mati framkvæmdarstjórnarinnar átti sá munur sér ekki eðlilegar skýringar í kostnaði. Að síðustu var reglugerðinni ætlað að bæta úr skorti á tölfræðilegum upplýsingum um markaðinn fyrir bögglasendingar á milli landa.
Efni: Í reglugerð 2018/1263 sem hér er til umfjöllunar, eru sett fram upplýsingaform sem þeim sem starfa við að flytja böggla ber að fylla út. Formin sem eru tvö og eru vegna upplýsinga sem slíkum aðilum ber að leggja fram samkvæmt grein 4 1 og 4 3 í reglugerð 2018/644. Upplýsingarnar eru um atriði eins og afkomu, fjölda starfsmanna, fjölda böggla auk annarra atriða.
Umsögn: Innleiðing reglugerðarinnar mun hafa í för með sér aukin verkefni fyrir póst og fjarskiptastofnun og að einhverju leyti aukinn kostnað fyrir stofnunina. Gert er ráð fyrir að sá kostnaður geti numið um 1,4 m.kr.
Lagastoð/breytingar: Gert er ráð fyrir lagaheimild fyrir reglugerðir sem þessa í frumvarpi til nýrra laga um póstþjónustu. Þar er sérstök heimild til að innleiða reglugerðina í 7. tölul. 41. gr. Verði frumvarpið að lögum skapast lagastoð fyrir ráðherra til að setja reglugerðir sem þessa.