Nýfæði - 32020R1993

Gerðin varðar reglugerð (ESB) 2015/2283 um markaðssetningu og notkun á nýfæði innan Evrópusambandsins og framkvæmdareglugerð 2017/2470 sem kveður á um lista Sambandsins yfir leyfilegt nýfæði.

Samkvæmt framkvæmdareglugerð (ESB) 2019/760 er leyfilegt að markaðssetja bíómassa úr gersveppnum (Yarrowia lipolytica) sem fæðubótarefni eins og skilgreint er í tilskipun þingsins og ráðsins 2002/46/EC, að undanskildum fæðubótarefnum fyrir börn og smábörn.

Sótt hefur verið um leyfi til að markaðssetja selenbættan bíómassa úr gersveppum (Yarrowia lipolytica) sem nýfæði í fæðubótarefni í samræmi við 10. gr. reglugerðar (ESB) nr. 2015/2283, að undanskildum fæðubótarefnum fyrir börn og smábörn.

Framkvæmdastjórnin óskaði umsagnar Matvælaöryggisstofnunar Evrópu (EFSA) sem skilaði áliti og telur að efnið sé öruggt til notkunar í fæðubótarefni. Stofnunin setti þó þann fyrirvara að fyrir neytendur sem þegar neyta fæðis með hátt seleninnihald gæti neyslan leitt til þess að farið væri yfir æskileg efri mörk fyrir selen. Vegna athugasemda stofnunarinnar breytti umsækjandi umsókn sinni um hámarksinnihald fyrir efnið í fæðubótarefnum þannig að ekki væri hætta á að samanlögð neysla fæðu með hátt innihald selens og fæðubótarefna með selenbættan bíómassa færi yfir æskileg efri mörk fyrir selen.

Framkvæmdastjórnin telur að í samræmi við álit stofnunarinnar og með tilliti til þeirra breytinga sem gerðar voru á umsókninni sé hægt að leyfa selenbættan bíómassa úr gersveppum (Yarrowia lipolytica) sem nýfæði til notkunar í fæðubótarefni.

Viðauka við framkvæmdareglugerð (ESB) 2017/2470 er breytt í samræmi við viðauka við þessa reglugerð og með þeim skilyrðum sem þar koma fram.