32021R0057

Í 63. tl. XVII. viðauka við reglugerð (EB) nr. 1907/2006 (REACH) eru taldar upp þær takmarkanir sem gilda á markaðssetninguog notkun á blýi og blýsamböndum.

Evrópusambandið og 23 aðildarríki eru samningsaðilar að samningi um verndun votlendisfugla sem ferðast milli Afríku og Evrópu. Í samningnum er krafist af samningsaðilum að hverfa frá notkun blýskota við veiðar í votlendi í áföngum en þó eins fljótt og auðið er í samræmi við tímaáætlun sem aðildarríki hefur sett sér eða verið birt opinberlega.

Í 2. mgr. 4. gr. tilskipunar Evrópuþingsins og ráðsins (EB) nr. 147/2009 er krafist að aðildarríkin leggi sérstaka áherslu á vernd votlendis, einkum votlenda sem hafa alþjóðlegt gildi, með því að gera varðveisluráðstafanir m.t.t. farfugla.

Þann 3. desember 2015 bað framkvæmdarstjórnin Efnastofnun Evrópu (ECHA) um að útbúa málsskjöl m.t.t. þess að skoða útvíkkun á takmörkunum í XVII. viðauka sem gilda um blý og blýsambönd til að takmarka áhættu á umhverfi og heilbrigði manna sem hlýst af notkun blýs og blýsambanda í byssuskotum við veiðar í votlendi.

Þann 21. júní 2017 birti ECHA málsskjöl þar sem lagt var til að takmarka notkun blýs og blýsambanda í byssuskotum við veiðar með haglabyssu innan votlendis eða þar sem notuð byssuskot lenda innan votlendis. Jafnframt var lagt til að takmarka vörslu byssuskota í votlendi sem innihalda blý í styrkleika 1% eða hærri. Niðurstaða stofnunarinnar var sú að notkun blýs í byssuskotum í votlendi leiðir til áhættu fyrir votlendisfugla sem innbyrða notuð byssuskot, þ.e. eiturefnafræðilegra áhrifa, þ.m.t. dauða. Stofnunin lagði til 3 ára aðlögunartíma fyrir takmörkunina.

ECHA benti á að nú þegar væru til staðgöngulausnir fyrir blý í byssuskotum t.d. stál og bismút. Þessar staðgöngulausnir eru auðfáanlegar, tæknilega framkvæmanlegar og hafa mun minni áhættu á heilsu manna og umhverfi en blý.

Málsskjölin voru lögð fyrir RAC og SEAC, nefndir á vegum Efnastofnunar Evrópu og skilaði stofnunin áliti þeirra til framkvæmdastjórnarinnar þann 17. ágúst 2018. Eftir að hafa tekið málsskjölin, álit RAC og SEAC, félagshagfræðileg áhrif og aðgengi að staðgöngulausnum til greina var niðurstaða framkvæmdastjórnarinnar að áhætta fyrir umhverfið og möguleg áhætta fyrir heilbrigði manna vegna byssuskota sem hleypt er af innan votlendis eða í kringum votlendi sé óviðunandi, sem mæta þurfi á grundvelli Evrópusambandsins í formi takmörkunar sem bætist við sem 11. mgr. við 63. tl. XVII. viðauka við reglugerð (EB) nr. 1907/2006 (REACH).

Eftir 15. febrúar 2023 verður bannað innan votlendis eða 100 m útfrá votlendi að:
- hleypa af skoti sem inniheldur blý í styrkleikanum 1% eða hærra.
- bera slík skot við veiðar í votlendi eða í aðstæðum sem tengjast veiðum í votlendi.

Takmörkunin nær aðeins til þess að hleypa af og bera blýskot en ekki til setningar þeirra á markað.

Aðlögunartíminn er gefinn til að tryggja hagsmunaaðilum nægan tíma til að aðlaga sig að nýrri takmörkun og að aðildarríkin fái nægan tíma til að undirbúa sitt eftirlit.

Ef a.m.k. 20% af yfirráðarsvæði, að frátalinni landhelgi, aðildarríkis er votlendi má það aðildarríki vera undanþegið fyrrgreindri takmörkun og fylgja takmörkun sem nær einnig til markaðssetningar. Sú takmörkun bætist við sem 12. mgr. við 63. tl. XVII. viðauka við reglugerð (EB) nr. 1907/2006 (REACH).

Eftir 15. febrúar 2024 verður bannað á öllu yfirráðarsvæði aðildarríkis að:
- setja á markað byssuskot sem inniheldur blý í styrkleikanum 1% eða hærra.
- hleypa af slíku byssuskoti.
- bera slík skot við veiðar í votlendi eða í aðstæðum sem tengjast veiðum í votlendi.

Aðildarríki sem hyggst nýta þetta ákvæði skal tilkynna framkvæmdastjórninni um það fyrir 15. ágúst 2021 og senda innihald innleiddra landsráðstafanna eigi síðar en 15. ágúst 2023.

Þau aðildarríki sem hafa nú þegar innlend ákvæði sem ganga lengra í að banna eða takmarka blý í byssuskotum til verndar umhverfi og heilbrigði manna heldur en kveðið er á í þessari reglugerð mega halda slíkum ákvæðum.

Reglugerðin tekur gildi á tuttugasta degi eftir birtingu hennar í Stjórnartíðindum Evrópusambandsins.