32009L0073

Tilskipun 2009/73/EB setur reglur um skipulag og starfsemi jarðgasiðnaðar, aðgang að mörkuðum, skilyrði og ferla varðandi leyfisveitingar og rekstur jarðgaskerfa. Markmið tilskipunarinnar er að skýra reglur um sameiginlegan innri markað með jarðgas.

Hvað varðar tilskipun 2003/55/EB þá er ekki til staðar formleg undanþága fyrir Ísland. Hins vegar var sameiginlegur skilningur milli Íslands, EFTA, ESA og ESB um að ekki væri þörf á því að innleiða ákvæði tilskipunarinnar hér á landi sökum þess að engin starfsemi sem fellur undir gildissvið tilskipunarinnar er til staðar hér á landi. Í desember 2009 sendi Eftirlitsstofnun EFTA hins vegar íslenskum stjórnvöldum formlegt bréf (letter of formal notice) vegna skorts á innleiðingu tilskipunarinnar og var því svarað 15. febrúar 2010. Er það mál enn til meðferðar hjá ESA en hefur verið sett í bið þar til skýrist með innleiðingu gerðar 2009/73/EB.

Óskað hefur verið eftir fullri undanþágu frá tilskipun 2009/73/EB þar sem hér er enginn markaður með jarðgas. Gert er ráð fyrir fullri undanþágu frá ákvæðum tilskipunarinnar á meðan slík starfsemi fer ekki fram hér á landi. Komi slík starfsemi til í framtíðinni yrði væntanlega að setja lög um starfsemina til að innleiða reglur tilskipunarinnar.