32010R0073

Markmið reglugerðar framkvæmdastjórnarinnar (ESB) nr. 73/2010 er að tryggja og samhæfa gæði fluggagna og –upplýsinga, Aeronautical Data Quality, ADQ. Kveðið er á um nákvæmni, upplausn og heilleika og uppruna gagna, framleiðslu upplýsinga, geymslu, meðhöndlun, úrvinnslu, flutning og dreifingu gagna og upplýsinga. Slík fluggögn og - upplýsingar eru notuð bæði af millilanda og innanlandsflugi.
Mörg Evrópuríki hafa átt í erfiðleikum með að uppfylla kröfur reglugerðarinnar og hafa sum óskað eftir frestun á gildistöku. Vandamál ríkjanna hafa ítrekað verið rædd í nefnd um samevrópska loftrýmið, þ.e. Single Sky Committee. Í könnun sem var framkvæmd, nefna ríkin vandamál eins og skort á leiðbeiningarefni, kostnað, skort á mannafla, óskýrar kröfur og fl.
Í janúar 2014 var gerð úttekt á ISAVIA af óháðum aðila sem gaf stöðumat á því hvar ISAVIA stendur gagnvart kröfum reglugerðarinnar. Niðurstaða úttektarinnar var sú að ISAVIA uppfyllir kröfur reglugerðarinnar um 35% leyti. Kom þar fram að óvissa væri til staðar um hvernig kröfur reglugerðarinnar yrðu uppfylltar, og er því ennþá óvissa um hve mikill kostnaðurinn verður. Auk þeirra atriða sem að ofan greinir hefur ekki verið tekin ákvörðun um hvaða tækni verður notuð til að uppfylla þær kröfur sem gerðar eru í reglugerðinni. Mat ISAVIA á kostnaðinum er með þesssum hætti:
Neðri mörk Efri mörk
Við innleiðingu 119 m.kr. 265 m.kr.
Árlegur rekstrarkostnaður 12 m.kr. 43 m.kr.
Í þessari áætlun er sú forsenda gefin að kröfur um Airport Terrain & Obstacle Database, E-TOD svæði 2 og 3 (rafræn hindranagögn) eigi eingöngu við um Keflavíkur-, Reykjavíkur-, Akureyrar og Egilsstaðarflugvelli. E-TOD reglur ICAO eru um að gera þurfi hækkunarlínu fyrir öll mannvirki við flugvelli.
Ætla má að kostnaður ISAVIA lendi á viðskiptavinum félagsins, þ.e. þeim sem stunda yfirflug yfir íslenska flugumferðarstjórnunarsvæðið, flug til og frá landinu og innanlandsflug.
Hagsmunaaðilar eru: Veitendur upplýsingaþjónustu flugmála, veitendur flugleiðsöguþjónustu, rekstraraðilar flugvalla og Samgöngustofa sem eftirlitsaðili með framkvæmd reglugerðarinnar á Íslandi.
Kynning reglugerðarinnar hefur fyrst og fremst beinst að ISAVIA sem er veitandi upplýsingaþjónustu flugmála og flugleiðsögu ásamt því að vera rekstraraðili flugvalla. Reglugerðin hefur verið kynnt á samráðsfundum en jafnframt sátu fulltrúar Samgöngustofu og Isavia vinnustofu vegna reglugerðarinnar hjá Eurocontrol.