32013R1257

Útdráttur:
Reglugerðin hefur að markmiði að fullgilda Hong Kong samning Alþjóðasiglingamálastofnunarinnar (IMO) frá 2009, um endurvinnslu skipa, en hann tekur gildi 24 mánuðum eftir fullgildingu samningsins (þegar a.m.k. 15 ríki samningsins hafa fullgilt hann, auk annarra skilyrða, sem eru uppfyllt m.a. eftir fullgildingu Evrópusambandsins (sem var 20. nóv. 2013).

Gildistaka:
Reglugerðin tekur gildi í Evrópusambandinu á tímabilinu frá 31. des. 2015, til 31. des. 2018 (sjá þó 32. gr.), að uppfylltum tilteknum skilyrðum.

Gildissvið:
Reglugerðin tekur til allra skipa skv. 2. gr. sem sigla undir fána í aðildarríkjum ESB (EES) en einnig þeirra skipa sem sigla undir fána þriðju ríkja sbr. 12. gr. Þó nær reglugerðin hvorki til þeirra skipa sem eru minni en 500 brúttó tonn, mælt skv. alþjóðasamningi um mælingar skipa frá 1969, né heldur til þeirra skipa sem sigla einungis í lögsögu fánaríkis skipsins.

Listi yfir hættuleg efni:
Óheimil er notkun efna sem talin eru upp í viðauka I við smíði og rekstur skipa, sem falla undir reglugerðina.
Ný skip skulu útbúa og hafa tilbúinn lista yfir hættuleg efni/spilliefni, sbr. viðauka II, sem eru í sjálfu skipinu. Eldri skip skulu uppfylla þetta skilyrði eins langt og raunhæft er (practicable).
Um er að ræða lista yfir hættuleg efni sbr. viðauka II (sem inniheldur einnig öll efni í viðauka I) og magn þeirra. Nánar tiltekið skal listinn innihalda upplýsingar um staðsetningu efnanna í skipinu, upplýsingar um hættuleg efni sem eru í skipinu vegna reksturs þess, og upplýsingar um geymslur skipsins.

Áætlun um niðurrif:
Eigandi skips þarf að leggja fram til niðurrifsaðila listann sem rætt er um að ofan yfir hættuleg efni. Niðurrifsaðili gerir áætlun um hvernig hann hyggst meðhöndla skipið til niðurrifs. Áætlunina þarf að samþykkja af yfirvöldum þar sem niðurrif/endurvinnsla fer fram og senda skriflegt samþykki til endurvinnsluaðila, eiganda skips og stjórnvalda þar sem skip er skráð í hvert sinn.
Þegar niðurrifsaðgerð er lokið þarf að senda staðfestingu til yfirvalda sem gáfu út niðurrifsleyfið innan 14 daga um að því sé lokið. Þar skal fylgja skýrsla um bæði umhverfisslys og eða slys á starfsfólki sem hugsanlega hafa orðið við starfsemina.

Listi yfir niðurrifsaðila:
Niðurrifsaðili fær að hámarki starfsleyfi til fimm ára.
Lögbært yfirvald skal taka saman lista yfir aðila sem uppfylla skilyrði þess að geta meðhöndlað skips til niðurrifs sbr. kröfur reglugerðarinnar. Skila þarf listanum til framkvæmdastjórnar ESB (ESA) fyrir 31. mars 2015. Birta skal listann um viðurkennda niðurrifsaðila í OJ ekki seinna en 31. des. 2016, bæði um aðila í ESB og utan ESB sem uppfylla skilyrðin.

Þriðju ríki:
Skip frá þriðju ríkjum þurfa einnig að hafa lista yfir hættuleg efni komi þau til hafnar í ESB. Einnig fjallað um kröfur og skráningar á aðilum sem ætla að vera með niðurrif á skipum og hvernig þau sækja um og sýna fram á að þau uppfylli skilyrði reglugerðarinnar.

Senda þarf skýrslu um endurvinnslu skipa á 3 ára fresti til framkvæmdastjórnar ESB (ESA).

Umhverfisstofnun:
Lög um meðhöndlun úrgangs nr. 55/2003. Reglugerð um flutning úrgangs á milli landa nr. 822/2010.
Umhverfisstofnun leggur til að stofnunin verði lögbært yfirvald og gefi út starfsleyfi fyrir niðurrif skipa sem falla undir þessa reglugerð hér á landi og verði skilgreint sem lögbært stjórnvald sem samþykkir áætlanir um niðurrif skipa, og þar af leiðandi þarf að breyta lögum um hollustuhætti og mengunarvarnir nr. 7/1998, reglugerð um starfsleyfi fyrir atvinnurekstur sem getur haft í för með sér mengun nr. 785/1999 og reglugerð um mengunarvarnareftirlit nr. 786/1999.

Samgöngustofa:
Umhverfisstofnun leggur til að eftirlit með listum um hættuleg efni verði hluti af eftirliti Samgöngustofu með skipum. Því þarf að breyta lögum um eftirlit með skipum nr. 47/2003 og reglugerð um framkvæmd 14. gr. tilskipunar Evrópuþingsins og ráðsins 2009/16/EB að því er varðar víðtækar skoðanir á skipum nr. 817/2011.
Rétt er að Innanríkisráðuneytið gefi frekari upplýsingar um hugsanlegar aðrar reglugerðir sem þyrfti að breyta vegna aðkomu Samgöngustofu.