32014L0060

1. Stutt lýsing á þeirri leið sem áformuð er og rökstuðningur fyrir henni: Með tilskipun 2014/60/ESB er gildissviðið rýmkað þannig að það nái til hvers konar menningarminja sem aðildarríki flokkar eða skilgreinir, samkvæmt landslögum eða stjórnsýslureglum, sem þjóðarverðmæti með listrænt, sögulegt eða fornfræðilegt gildi í skilningi 36. gr. sáttmálans um starfshætti Evrópusambandsins. Enn fremur þurfa menningarminjar, flokkaðar eða skilgreindar sem þjóðarverðmæti, ekki lengur að tilheyra flokkum eða uppfylla viðmiðanir er varðar aldur og/eða fjárhagslegt gildi til þess að uppfylla skilyrði þess að þeim verði skilað á grundvelli tilskipunarinnar.

Þá er samstarf milli aðildarríkja aukið til að stuðla að skilvirkari og samræmdari beitingu tilskipunarinnar. Þannig er þess krafist að stjórnvöld skiptist á upplýsingum um menningarminjar sem fluttar eru ólöglega í forritseiningu í IM-upplýsingakerfinu, sem er sérsniðið fyrir menningarminjar.

Frestur til að meta hvort menningarminjar, sem finnast í öðru aðildarríki, teljast menningarminjar í skilningi tilskipunar 93/7/EBE hefur verið talinn of stuttur. Af þeim sökum lengir tilskipun 2014/60/ESB frestinn úr tveimur mánuðum í sex mánuði. Einnig er frestur til að hefja málsmeðferð vegna skila lengdur úr einu ári í þrjú ár, eftir að aðildarríki það sem menningarminjar voru fluttar frá, kemst að raun um staðsetningu menningarminjanna og hver sé handhafi þeirra eða vörsluaðili.
2. Helstu fyrirhuguðu breytingar á gildandi lögum og reglum, hvort heldur bætt er við eða fellt brott: Breyta þarf eftirtöldum ákvæðum í lögum nr. 57/2011: 4. mgr. 6. gr. (skil á menningarminjum, sex mánuðir í stað tveggja), 3. mgr. 8. gr. (dómskröfur um skil á menningarminjum, þrjú ár í stað eins) og 9. gr. (tímamörk, frá 1. janúar 1993 í stað 1. janúar 1995).
Markmiðið með þeim breytingum sem fram koma tilskipun 2014/60/ESB er að rýmka gildissvið eldri tilskipunar þar sem lítið hefur reynt á hana, svo sem vegna stuttra tímafresta. Árangur má því mæla með að skoða hvort reyna muni meira á lög nr. 57/2011 eftir breytingar. Þó verður að hafa í huga í því sambandi að aldrei hefur reynt á lögin.