F-gas - 32014R0517

Með reglugerðinni eru settar reglur um aðgerðir til að draga úr losun, um viðskipti, takmarkanir og skerðingu á framboði flúoraðra gróðurhúsalofttegunda. Sett eru skilyrði á framleiðendur og innflytjendur efnanna og rekstrar- og þjónustuaðila kerfa sem innihalda efnin.
Með reglugerð (EB) 842/2006 var komið á kröfum um menntun og vottun fyrirtækja og starfsmanna sem sinna uppsetningu, starfrækslu, lekaleit og viðhaldi kerfa sem innihalda flúoraðar gróðurhúsalofttegundir á borð við kæli-, loftræsti-, varmadælu- og slökkvikerfi. Nú verða aðeins minniháttar breytingar á gildissviðinu þar sem við bætast kælikerfi í flutningabílum og tengivögnum. Með reglugerð (EB) 842/2006 voru í fyrsta skipti settar takmarkanir á markaðssetningu flúoraðra gróðurhúsalofttegunda og nú verða þær takmarkanir hertar enn frekar.

Sett eru skilyrði um að brugðist verði við lekum á kerfum sem innihalda flúoraðar gróðurhúsalofttegundir eins og með því að leitað verði að lekum með kerfisbundnum hætti í kerfum sem innihalda magn flúoraðra gróðurhúsalofttegunda upp á 5 t af CO2 ígildum (10 t fyrir loftþétt kerfi).
Rekstraraðilar kerfa eru ábyrgir fyrir því að haldin sé skrá yfir notkun kerfanna þegar kemur að áfyllingu, aftöppun og förgun flúoraðra gróðurhúsalofttegunda á kerfunum og að þjónusta kerfisins sé veitt af vottuðum aðila. Þeir eru jafnframt ábyrgir fyrir því að endurheimt efna sé framkvæmd af vottuðum aðila.

Framleiðendur flúoraðra gróðurhúsalofttegunda skulu gera allar viðeigandi ráðstafanir til að koma í veg fyrir losun efnanna við framleiðslu, flutning og geymslu. Við markaðssetningu efnanna skal sýna fram á að tríflúormetan sem myndaðist við framleiðsluna hafi verið fargað eða endurheimt í samræmi við bestu fáanlegu tækni.

Aðildarríki skulu koma á vottunarkerfi þar sem tryggt er að einstaklingar geti fengið þá þjálfun sem nauðsyn krefur og mat á þekkingu þeirra verði framkvæmt. Vottun sem veitt hefur verið í samræmi við fyrri reglugerð heldur gildi sínu. Kröfur til vottunar fyrirtækja og starfsmanna þeirra koma fram í öðrum reglugerðum og engin breyting verður á þeim. Einungis má selja flúoraðar gróðurhúsalofttegundir til þeirra sem hafa hlotið vottun. Aðildarríki skulu tryggja að vottaðir aðilar hafi aðgang að upplýsingum um reglur varðandi staðgönguefni og tækni og að þeir eigi kost á þjálfun í þeim atriðum sem krafist er vottunar fyrir.

Í III. viðauka koma fram takmarkanir á markaðssetningu hluta sem innihalda flúoraðar gróðurhúsalofttegundir. Mikilvægustu nýmælin þar eru bann við markaðssetningu nýrra heimiliskæli- og ísskápa frá og með 1. janúar 2015 (miðað við hnatthlýnunarmátt, GWP > 150), nýja kæliskápa í verslunum í þrepum frá og með 1. janúar 2020 (GWP > 2500) og 1. janúar 2022 (GWP > 150) og ný kælikerfi í verslunum frá og með 1. janúar 2022 (GWP > 150). Að auki verður bannað að fylla á kerfi eftir 2030, og aðeins með endurheimtum og endurunnum efnum eftir 2020, ef GWP er > 2500 og magnið > 40 CO2 ígildistonn. Þó skal bannið ekki gilda um búnað sem uppfyllir skilyrði um visthönnun, notar minni orku og hefur í för með sér minni heildarlosun gróðurhúsalofttegunda en búnaður sem notar ekki vetnisflúorkolefni.

Búnað, sem inniheldur flúoraðar gróðurhúsalofttegundir, skal merkja með upplýsingum um að hann innihaldi slík efni, viðurkennt viðskiptaheiti kælimiðils, magn og CO2 ígildi þess.

Komið verður á kvótum á markaðssetningu flúoraðra gróðurhúsalofttegunda og þak sett á það magn sem heimilt verður að markaðssetja ár hvert reiknað í CO2 ígildistonnum. Úthlutun hefst 2015 og er miðað við meðaltal þess sem markaðssett var á árunum 2009 til 2012. Magn þetta skerðist í áföngum til 2030 þegar þakið verður í 21% miðað við upphaflega úthlutun 2015 eins og lýst er í V. viðauka. Innflytjendur og framleiðendur sem tilkynntu um markaðssetningu skv. reglugerð (EB) nr. 842/2006 hafa forgang við úthlutun kvóta.
Innflutningur á efnum, sem fyllt hafa verið á búnað, skal falla undir innflutningskvóta í samræmi við IV. kafla frá og með 1. janúar 2017.

Skrá skal innflutning á HFC og einnig öðrum flúoruðum gróðurhúsalofttegundum sem talin eru upp í II. viðauka ef árlegt magn er yfir 1 tonni eða 100 CO2 ígildistonn. Aðkomu endurskoðanda er þörf fari markaðssett magn yfir 10.000 CO2 ígildistonn á ári. Skráningin skal vera í samræmi við VII. viðauka.

Reglugerðin gildir frá og með 1. janúar 2015.