32015L1513

Helstu breytingar á tilskipun 98/70/EB
Minnkun gróðurhúsalofttegunda
Með tilskipun (ESB) 2015/1513 eru gerðar breytingar á ákvæði 7. gr. a tilskipunar 98/70/EB, sem fjallar um minnkun á losun gróðurhúsalofttegunda. Í fyrsta lagi er því ákvæði bætt við að aðildarríkin geti heimilað birgjum lífeldsneytis til notkunar í flugi að taka þátt í minnkunarskyldunni sem kveðið er á um í 2. mgr. 7. gr. a. Í öðru lagi er aðildarríkjum gefinn kostur á, í því skyni að uppfylla minnkunarskylduna, að leggja hámark við framleiðslu lífeldsneytis úr korni og öðrum sterkjuríkum plöntum, sykri, olíuplöntum og plöntum sem eru ræktaðar aðallega í því skyni að framleiða orku, í samræmi við ákvæði tilskipunar 2009/28/EB, um að auka notkun orku frá endurnýjanlegum orkugjöfum.
Þá er 7. mgr. bætt við 7. gr. a. Hún kveður á um að aðildarríki skuli krefjast þess að þeir birgjar sem skila árlegri skýrslu skv. 1. mgr. 7. gr. a skili tilteknum upplýsingum til viðbótar í þeirri skýrslu, þ.á m. bráðabirgðamati á losun frá lífeldsneyti vegna óbeinna breytinga á land-nýtingu. Jafnframt segir að aðildarríkin skuli skila þeim upplýsingum til framkvæmda-stjórnarinnar.

Viðmiðanir um sjálfbærni fyrir lífeldsneyti
Með breytingu á 2. mgr. 7. gr. b, er horfið frá 35% lágmarki minnkunar á losun gróðurhúsa-lofttegunda með notkun lífeldsneytis sem talin er með að því er varðar 1. mgr. ákvæðisins og þess í stað skal minnkunin vera a.m.k. 60% vegna lífeldsneytis sem framleitt er í orkuverum þar sem starfræksla hófst eftir 5. október 2015.
Ef um er að ræða orkuver sem voru í rekstri 5. október 2015 eða fyrir þann tíma, er gerð krafa um minnkun á losun gróðurhúsalofttegunda með notkun lífeldsneytis um a.m.k. 35% fram til 31. desember 2017 og um a.m.k. 50% frá og með 1. janúar 2018. Með þessu ákvæði eru gerðar breytingar á núgildandi viðmiðum minnkunar sem eru annars vegar 50% frá og með 1. janúar 2017 og hins vegar 60% frá og með 1. janúar 2018.

Vöktun og skýrslugerð
Með breytingu á 3. mgr. 8. gr. tilskipunar 98/70/EB er skilafrestur fyrir skil á skýrslu aðildarríkja með gögnum um gæði innlends eldsneytis fyrir undangengið ár nú 31. Ágúst, í stað 30. júní áður.

Viðaukar
V. viðauka er bætt við tilskipun 98/70/EB með tilskipun (ESB) 2015/1513. Í A-hluta viðaukans er bráðabirgðamat á losun frá lífeldsneyti vegna óbeinna breytinga á landnýtingu. Í B-hluta er tiltekið frá hvaða gerðum lífeldsneytis losun vegna óbeinna breytinga á landnýtingu skuli teljast vera núll.

Helstu breytingar á tilskipun 2009/28/EB

Tilskipun 2009/28/EB var innleidd með lögum nr. 40/2013 um endurnýjanlegt eldsneyti í samgöngum á landi og reglugerð nr. 870/2013 um söfnun gagna um framleiðslu, innflutning, geymslu og sölu á eldsneyti og eftirlit með orkuhlutdeild endurnýjanlegs eldsneytis í heildarsölu til samgangna á landi. Atvinnuvega- og nýsköpunarráðuneytið fer með lög nr. 40/2013 og Orkustofnun með framkvæmd reglugerðar nr. 870/2013.

17.-21. gr. tilskipunarinnar voru innleiddar með reglugerð nr. 750/2013 um viðmiðanir í sjálfbærri lífeldneytisframleiðslu, sem er á forræði umhverfis- og auðlindaráðuneytisins. Orkustofnun fer með framkvæmd reglugerðar nr. 750/2013.

IX. viðauka er bætt við tilskipun 2009/28/EB með tilskipun (ESB) 2015/1513. Í viðaukanum er listi yfir eldsneyti sem telja megi tvöfalt í markmiði gr. 3(4) tilskipunarinnar.

Viðmiðanir um sjálfbærni fyrir lífeldsneyti
Með tilskipun (ESB) 2015/1513 er lágmarki minnkunar á losun gróðurhúsalofttegunda, sbr. 2. mgr. 17. gr. tilskipunar 2009/28/EB, breytt á sama veg og 2. mgr. 7. gr. b tilskipunar 98/70/EB, sjá framar.

Sértæk ákvæði varðandi notkun endurnýjanlegra orkugjafa í samgöngum
Með tilskipun (ESB) 2015/1513 er 21. gr. tilskipunar 2009/28/EB felld brott.