32015R1222

Í reglugerð (EB) nr. 714/2009 eru settar fram reglur, án mismununar, um skilyrði fyrir aðgangi að raforkukerfi fyrir raforkuviðskipti yfir landamæri, einkum reglur um úthlutun flutningsgetu og ráðstafanir til að bregðast við kerfisöng hvað varðar samtengingar og flutningskerfi sem hafa áhrif á raforkuflæði yfir landamæri. Reglugerð 2015/1222 setur fram samræmdar lágmarksreglur um að koma á sameiginlegum næstadags- og innandagstengingum og setja þannig fram skýran lagaramma hvað varðar skilvirka og nútímalega úthlutun flutningsgetu og ráðstafanir til að bregðast við kerfisöng sem greiðir fyrir raforkuviðskiptum.

Til að koma sameiginlegum næstadags- og innandagstengingum til framkvæmda þurfa flutningskerfisstjórar að reikna út með samræmdum hætti þörf á fyrirliggjandi flutningsgetu yfir landamæri. Þeir ættu í þessu skyni að koma á sameiginlegu flutningskerfislíkani, sem felur m.a. í sér mat á framleiðslu, álagi og stöðu raforkukerfisins á hverjum klukkutíma. Að jafnaði ætti að reikna fyrirliggjandi flutningsgetu út samkvæmt svokallaðri flæðistengdri útreikningsaðferð en í þeirri aðferð er höfð hliðsjón af því að raforka getur flætt eftir ólíkum leiðum og bestar fyrirliggjandi flutningsgetu í verulega víxlháðum flutningskerfum.

Samkvæmt gildissviðsákvæði reglugerðarinnar 1(2) gildir reglugerðin um öll flutningskerfi og samtengingar í Sambandinu nema flutningskerfi á eyjum sem eru ekki tengd öðrum flutningskerfum um samtengla. Ísland er ótengt öðrum raforkukerfum í Evrópu og því verður reglugerðin ekki innleidd hér á landi.