Ákvörðun H8 um starfsreglur og skipan tækninefndar um gagnavinnslu - 32016D0720(01)

Ákvörðunin er tekin með stoð í 72. og 73. gr. reglugerðar (EB) nr. 883/2004 og kemur í stað ákvörðunar nr. H2 frá 12. júní 2009. Framkvæmdaráðið ákveður umboð tækninefndarinnar með hliðsjón af sérstökum verkefnum hennar. Í ákvörðuninni er fjallað um það hvernig nefndin skuli skipuð. Tekið er fram að það sé fulltrúi ríkisstjórnar viðkomandi aðildarríkis í framkvæmdaráðinu sem eig að framsenda tilnefningu fulltrúa þess ríkis í tækninefndina til skrifstofuþjónustu framkvæmdaráðsins. Fulltrúanum er heimilt að hafa með sér sérfræðing á fundina þegar það telst nauðsynlegt vegna umræðuefnisins. Í ákvörðuninni er kveðið á um formennsku í tækninefndinni á víxl, fundarboð, dagskrá, samþykkt skýrslna, upplýsingaöflun, vinnuhópa um sérstök mál, atkvæðagreiðslur, fundargerðir, skýrslugjöf til framkvæmdaráðsins ofl.

Breytingar frá ákvörðun nr. H2 eru m.a. þær að í 2. gr. er tekið fram að í sendinefnd hvers ríkis skuli ekki vera fleiri en fjórir einstaklingar. Í 9. gr er tekið fram að drög að dagskrá skuli sendast út a.m.k. 15 starfsdögum fyrir fund og að skjöl er varða dagskrárliði sem þarfnist ákvörðunar eða afstöðu á fundinum skuli gerð aðgengileg a.m.k. 10 starfsdögum fyrir fund. Í 10. gr. er fjallað um fundargerðir sem nefndin skal samþykkja og kveðið á um að ensk útgáfa fundargerðar skuli sendast út í síðasta lagi einum mánuði fyrir næsta fund í tækninefndinni. Í 11 gr. kemur fram að tækninefndin skuli gefa framkvæmdaráðinu skriflega skýrslu eftir hvern fund um störf sín og hverju nefndin hafi áorkað en áður var kveðið á um árlega skýrslugjöf tækninefndarinnar til framkvæmdaráðsins. Í 13. gr. kemur fram að skýrslur, dagskrá og skjöl varðandi starfsemi nefndarinnar skuli gerð á ensku.

Ákvörðunin kemur í stað ákvörðunar nr. H2 frá 12. júní 2009 og fellir hana úr gildi. Ákvörðun H2 var felld undir EES-samninginn með ákvörðun sameiginlegu EES-nefndarinnar nr. 76/2011.