32016L2102

Á ríkinu mun hvíla skylda til að tryggja aðgengi að opinberum vefjum, einkum fyrir fatlaða notendur. Kröfurnar eru sambærilegar og leitast var við að uppfylla með aðgengisstefnu fyrir opinbera vefi sem ríkisstjórnin samþykkti í maí 2012. Innleiðing tilskipunarinnar mun einnig hafa í för með sér skyldu til að fylgjast með því að opinberir vefir uppfylli lágmarksaðgengiskröfur og til að tryggja borgurum rétt til að leita til úrlausnaraðila um hvort þær séu uppfylltar.

Kostnaður hefur ekki verið metinn nákvæmlega en eins og áður segir er um lágmarkskröfur að ræða sem aðgengisstefnunni frá 2012 er ætlað að uppfylla. Frá árinu 2005 hafa verið framkvæmdar sjö úttektir á opinberum vefjum, meðal annars með hliðsjón af aðgengi skv. staðli alþjóðlegu staðlasamtakanna W3C, sem tilskipunin styðst einnig við. Loks eru ákvæði í tilskipuninni um að slakað sé á kröfum til aðgengis þegar vinna við að uppfylla þær teldist úr hófi fram. Samkvæmt framangreindu verður að ætla að innleiðing tilskipunarinnar muni ekki hafa í för með sér verulegan viðbótarkostnað miðað við núverandi skipan mála á sviðinu.