32017L2102

Tillagan snýr að því að lagfæra tiltekin atriði í tilskipun 2011/65/ESB í samræmi við ákvæði um endurskoðun hennar sbr. 1. mgr. 24. gr.

Eftirfarandi breytingar eru gerðar:
• Gefið er leyfi til að framleiða varahluti, sem ekki samræmast nýjum kröfum tilskipunarinnar, ef þeir eru til notkunar í búnað sem markaðssettur var áður en téðar kröfur tóku gildi. Breytingunni er ætlað að hægja á úreldingu búnaðar sem þegar er í umferð til samræmis við hugmyndafræði hringrásarhagkerfisins.
• Gefið er leyfi til að endurselja búnað, sem ekki samræmist nýjum kröfum tilskipunarinnar, ef hann var upprunalega markaðssettur áður en kröfurnar tóku gildi. Breytingunni er ætlað að hægja á úreldingu búnaðar sem þegar er í umferð til samræmis við hugmyndafræði hringrásarhagkerfisins.
• Pípuorgel eru undanþegin ákvæðum tilskipunarinnar. Pípur slíkra orgela innihalda blý og ekki hefur fundist viðeigandi staðgengill blýs í þeim.
• Texti er lagfærður varðandi færanlegan vélbúnað til nota utan vega, sem eingöngu er fáanlegur til nota í atvinnuskyni, með þeim hætti að ekki er lengur gerður greinarmunur á því hvort téður vélbúnaður er með innbyggðan aflgjafa eða gengur fyrir ytri rafstraum. Breytingin er til leiðréttingar á misræmi í reglusetningu gagnvart búnaði sem í öllum meginatriðum er sambærilegur.
• Bætt er við hámarksgildistíma fyrir undanþágur varðandi 11. flokk raf- og rafeindabúnaðar (sbr. I. viðauka við 2011/65/ESB), en hámarksgildistími hefur þegar verið settur fyrir alla aðra flokka.
• Fellt er út ákvæði þess efnis að framkvæmdastjórnin skuli taka ákvörðun um umsókn um endurnýjun undanþágu eigi síðar en 6 mánuðum áður en gildandi undanþága fellur úr gildi nema að sérstakar aðstæður séu fyrir hendi, sem réttlæta aðra fresti. Ákvæðið er fellt út þar sem það hefur ekki skilað góðri raun í praksis og hefur ekki dregið úr óvissu fyrir markaðssetjendur, enda helst undanþágan gild á meðan umsókn um endurnýjun er til úrvinnslu.