32017R0363

Í fyrsta lagi verða gerðar minni kröfur til viðhalds og viðgerða hjá þeim flugrekendum sem eingöngu eru í ferjuflugi.
Í öðru lagi verða heimildir til starfrækslu eins hreyfils flugvéla sem búnar eru hverfihreyflum, e. single-engined turbine aeroplanes, að næturlagi og við blindflugsskilyrð gerðar skýrari. Í dag þurfa einstök ríki að gefa út undanþágur. Í ICAO viðauka 6 er gert ráð fyrir því að slík starfræksla sé heimil og í þeim tilgangi að tryggja samræmi við viðaukann er umrædd breyting lögð til. Til grundvallar þessari breytingu liggur einnig álit EASA nefndarinnar, nr. 6/2015
Í þriðja lagi eru útfærðar kröfur um samþykki yfirvalda á þjálfunaráætlunum flugrekenda fyrir flutning á hættulegum farmi. Þannig er slakað á kröfum um samþykki flugmálayfirvalda á þjálfunaráætlunum fyrir loftför sem ekki eru notuð til að flytja farþega milli staða. Hér er til að mynda átt við loftför sem notuð eru til svokallaðs verkflugs. Til þess gæti talist dreifing áburðar, myndataka o.fl. Skilyrði er að ekki sé fluttur hættulegur varningur. Framangreindir flugrekendur þurfa eftir sem áður að gera þjálfunaráætlanir.
Áhrif hér á landi:
Í fyrsta lagi vegna áhrifa á ferjuflug eins og vísað er til í 1. gr. breytingarreglugerðarinnar er vakin athygli á því að engar íslenskar reglur eru í gildi hér á landi um ferjuflug. Fram til þessa hefur verið gert ráð fyrir að það sé rekið í samræmi við ákvæði reglugerðar ESB nr. 965/2012. Skoða þarf hvaða kröfur skuli gera í þessum efnum.
Í öðru lagi á ákvæði um starfrækslu eins hreyfils flugvéla með hverfihreyfla að næturlagi og við blindflugsskilyrði. Samgöngustofa vekur athygli á að fram til þessa hafa tiltekin Evrópulönd heimilað slíka starfsemi á grundvelli landbundinna undaþága. Hér á landi hefur ekki reynt á þetta. Samgöngustofa hefur enn ekki fengið beiðni um slíka heimild. Með breytingunum er stuðlað að jafnræði milli Evrópulanda og annarra ríkja sem heimila slíka starfsemi. Jafnframt er talið að þessar breytingar stuðli að umhverfisvænni rekstri loftfara þar sem um er að ræða eins hreyfils loftför í stað fjöl hreyfla loftfara sem eru knúin bulluhreyflum.
Þeir flugrekendur sem hyggjast stunda atvinnurekstur með eins hreyfils flugvélum með hverfilhreyfla þurfa að uppfylla viðbótarkröfur. Þær felast í breytingum á viðhaldsáætlunum, þjálfun áhafna, gerð verklagsreglna og mati á áreiðanleika hreyfla.
Samgöngustofa þarf að uppfæra innri kerfi s.s. verklagsreglur, gátlista og þjálfa eftirlitsmenn. Jafnframt þarf að útbúa leiðbeiningarefni og annað þessu tengt.
Í þriðja lagi á útfærslu krafna um þjálfunaráætlanir flugrekenda fyrir flutning á hættulegum farmi. Þar þarf Samgöngustofa að uppfæra verklagsreglur og gátlista.
Að mati Samgöngustofu tekur um 130-150 klst. að uppfæra innri kerfi stofnunarinnar vegna breytinga í tengslum við þjálfun fyrir flutning á hættulegum varningi og vegna starfrækslu einshreyfils flugvéla með hverfilhreyfli að næturlagi og við blindflugsskilyrði. Sá kostnaður gæti numið um 1.350.000 kr.
Flugrekendur sem hyggjast stunda atvinnuflug með eins hreyfils flugvélar að næturlagi og við blindflugsskilyrði þurfa að uppfylla þjálfunarkröfur, m.a. fyrir áhafnir, uppfæra viðhaldsáætlanir, setja fram verklagsreglur fyrir starfrækslu loftfara og uppfæra flugrekstrarhandbækur.
Þess ber að geta að engar einshreyfils flugvélar með hverfihreyfla eru skráðar hér á landi. Þrátt fyrir það ber Samgöngustofu skv. reglugerðinni að útfæra verklagsreglur og vinnulag í tengslum við slíka starfsemi.