32017R0920

Með samþykkt hinnar svo kölluðu TSM reglugerðar nr. 2015/2120 var ákveðið að ekki yrði leyfilegt að innheimta sérstök viðbótargjöld fyrir reikiþjónustu frá og með 15. júní 2017. Þess í stað skyldi verðalagning fyrir þjónustuna byggja á heimaverðskrá notandans, eða Roam Like Home. Með þessari breytingu var ekki einungis verið að afnema viðbótar reikigjöld (Evrópuverðskrá – Euro Tariff), heldur var um að ræða kerfisbreytingu á heildsölumarkaði fyrir reikiþjónustu, þ.e. hvernig gjaldfærslunni skuli hagað, hvernig skuli farið með fríðindi samkvæmt heimaverðskrá í reikiþjónustu, s.s. pakkar, innfaldar mínútur o.s.frv.
Ljóst var að breytingin samkvæmt TSM reglugerðinni myndi kalla á frekari breytingar á hinni eiginlegu reikireglugerð nr. 531/2012, þar sem ákvæði hennar um verðþök á viðbótargjöldum í smásölu og heildsölu myndu ekki lengur eiga við frá og með 15. ágúst 2017. Breyta þyrfti ákvæðum reglugerðarinnar á þann veg að gjaldfærsla fyrir reikiþjónustu færi samkvæmt heimaverðskrá notandans. Þar sem að huga þyrfti að ýmsum atriðum við útfærslu á nýju fyrirkomulagi heildsölumarkaðar fyrir reikiþjónustu var talin þörf á því að gefa út sérstaka reglugerð þar að lútandi að undangengnu samráði við markaðsaðila. Umrætt samráð framkvæmdastjórnarinnar fór fram á tímabilinu 29. nóvember 2015 til 18. febrúar 2016.
Það er nú í kjölfar áhrifagreiningar framkvæmdastjórnarinnar og að teknu tilliti til athugasemda fjarskiptafyrirtækja á evrópskum farnetsmarkaði sem nú hafa verið lagðar fram tillögur að framkvæmd nýs fyrirkomulags á heildsölumarkaði fyrir reikiþjónustu. Eingöngu er um að ræða útfærslu á skyldu, þ.e. gjaldfærslu samkvæmt heimaverðskrá, sem þegar er búið að leggja á með TSM reglugerðinni, sem innleidd var í íslenskan rétt með reglugerð ráðherra nr. 558/2016.
Samkvæmt 2. mgr. 35. gr. laga um fjarskipti nr. 81/2003 er heimilt að kveða á um hámarksverð fyrir reikiþjónustu bæði í smásölu og heildsölu. Þar sem nýtt fyrirkomulag um heimaverðskrá felur efnislega í sér það sama, þ.e. að verið er að setja ákveðið hámarksverð fyrir reikiþjónustuna, þ.e. heimaverðskrá í stað hámarks viðbótargjalds, var umrætt ákvæði talið fela í sér fullnægjandi lagastoð fyrir innleiðingu reikihluta TSM reglugerðarinnar. Að áliti Póst- og fjarskiptastofnunar gildir það sama um tillögu framkvæmdastjórnarinnar um fyrirkomulag heildsölumarkaðar fyrir reikiþjónustu sem umsögn þessi lýtur að.
Samkvæmt framangreindu er það mat Póst- og fjarskiptastofnunar að tillagan kalli ekki á lagabreytingu og að fyrir hendi sé fullnægjandi lagastoð fyrir innleiðingu á reglugerðinni með reglugerð ráðherra þegar þar að kemur.