32017R0997

Útdráttur
Með reglugerðinni er viðauka III við tilskipun 2008/98/EB breytt, en hann fjallar um þá eiginleika sem gera úrgang hættulegan, þ.e. þannig að úrgangurinn teljist vera spilliefni. Í viðaukanum er upptalning á 15 slíkum eiginleikum (hættuflokkar HP 1-15) og birtar viðmiðanir fyrir 14 þeirra (fyrir alla nema HP 14) sem ber að fylgja við flokkun og mat á hættulegum eiginleikum þegar ákvörðun er tekin um hvort úrgangur teljist spilliefni, t.d. viðmiðunarmörk fyrir hættuleg efni í úrganginum. Með þeirri gerð sem hér er til umfjöllunar eru settar samsvarandi viðmiðanir fyrir hættuflokk HP 14.

Reglugerðin öðlast gildi tuttugu dögum eftir birtingu hennar í Stjórnartíðindum Evrópusambandsins og koma ákvæði hennar til framkvæmdar ári síðar, þ.e. frá og með 5. júlí 2018.

Ákvæði viðauka III við tilskipun 2008/98/EB hafa verið innleidd í íslenskar réttarheimildir með II. viðauka við reglugerð nr. 1040/2016, um skrá yfir úrgang og mat á hættulegum eiginleikum úrgangs. Lagt er til að gerðin sem hér er til umfjöllunar verði innleidd með breytingu á fyrrnefndum II. viðauka við reglugerð nr. 1040/2016. Breytingin felst í að texti 1. tl. í viðauka við gerðina verði felldur í heild sinni undir kaflann sem merktur er HP 14 „Visteitruð efni“ í II. viðauka. Jafnframt verði felld brott athugasemd í næstsíðustu málsgrein sama viðauka.