Prospectus - 32017R1129

Reglugerðin um lýsingar fellir tilskipun 2003/71/ESB úr gildi og kemur í hennar stað. Reglugerðin var birt 30. júní 2017 í stjórnartíðindum ESB og tók gildi 20. júlí 2017. Flest ákvæði hennar taka þó ekki gildi fyrr en frá og með 21. júlí 2019.

Markmið reglugerðarinnar er, eins og fyrri tilskipunar, að tryggja fjárfestavernd og skilvirkni markaða samhliða því að bæta innri markaðinn með fjármagn. Greiða á aðgengi fyrirtækja að fjármögnun, þá sérstaklega lítilla og meðalstórra fyrirtækja. Í því skyni einfaldar reglugerðin reglur og stjórnsýslumeðferð. Þær breytingar sem reglugerðin kveður á um, frá fyrra regluverki eru í stuttu máli eftirfarandi:

- Undanþágur frá skyldu til útgáfu lýsinga í ákveðnum tilvikum (svo sem smærri útboða).
- Ný tegund lýsingar er kynnt til sögunnar, þ.e. Vaxtarlýsing ESB, sem er einfaldari lýsing fyrir minni fyrirtæki og smærri útgáfur.
- Endurskoðaðar reglur um efni lýsingar, þ.e. með það að markmiði að þær eru styttri og fela í sér betri upplýsingar til fjárfesta.
- Einföldun reglna m.t.t. seinni útgáfu skráðra fyrirtækja.
- Skjótari og einfaldari ferli fyrir tíða útgefendur.
- Aðgengi að öllum lýsingum á einum stað innan EES (vefsvæði Evrópsku verðbréfamarkaðseftirlitsstofnunarinnar).

Þá er kveðið á um skyldur eftirlita aðildarríkja til samstarfs við önnur eftirlit, hvort sem um er að ræða rannsóknir, eftirlit eða framfylgni við ákvarðanir. Aðrar breytingar sem reglugerðin kveður á um, eru t.d. styttri tímafrestir, styttri samantekt, meiri möguleikar í tengslum við útgáfu grunnlýsinga, hnitmiðaðri umfjöllun um áhættuþætti og ný fjárhæðarmörk.