32018L0843

Tilskipun Evrópuþingsins og ráðsins (ESB) 2018/843 frá 30. maí 2018 um breytingu á tilskipun (ESB) 2015/849 um ráðstafanir gegn því að fjármálakerfið sé notað til peningaþvættis eða til fjármögnunar hryðjuverka og um breytingu á tilskipunum 2009/138/EB og 2013/36/ESB.
Gerðinni er ætlað að bregðast við breytingum á aðferðum hryðjuverkamanna við að fjármagna aðgerðir sínar. Einnig er gerðinni ætlað að auka á aðgerðir til að sporna við skattsvikum.
Eflt er vald þeirra stofnana sem fara með eftirlit með peningaþvætti í hverju ríki og samstarf þeirra auðveldað. Þau munu þannig geta fengið aðgang að meiri upplýsingum en áður auk þess að hafa aðgang að miðlægum gagnabönkum og upplýsingum úr skrám með upplýsingum um greiðslur sem aðildarríkin verða nú að koma upp.
Aukið er eftirlit með notkun á nafnlausum greiðslukortum með innistæðu auk þess sem lækkaðar eru hámarksinnistæður á slíkum kortum úr 250 e í 150 e. Fyrirframgreidd kort frá löndum utan EES-svæðisins verður eingöngu hægt að nota í samræmi við reglur ESB.
Þá er aukið eftirlit með rafeyri og stöðum þar sem hægt er að skipta rafeyri yfir í venjulegt fé þar sem sýnt hefur verið fram á að hægt sé að komast framhjá venjulegu eftirliti við slík skipti.
Samkvæmt grein 32a ber aðildarríkjum EES skylda til að setja upp miðlæga skrá eða miðlægt kerfi þar sem bær stjórnvöld geta beint og milliliðalaust aflað upplýsinga um hverjir séu eigendur bankareikninga, greiðslureikninga og geymsluhólfa.
Samræmdar eru athuganir á ríkjum og viðskiptavinum frá löndum sem eru á lista yfir ríki þar sem veikleikar eru í eftirliti með peningaþvætti og eftirliti með hryðjuverkum. M.a. verður sett upp skrá yfir ríki þar sem slík áhætta er talin vera.
Þá fær almenningur fullan aðgang að tilteknum atriðum í skrá yfir þá sem teljast raunverulegir eigendur fyrirtækja og sjóða. Fullur aðgangur að öllum upplýsingum í skránni verður veittur öllum sem hafa til þess eðlilegar ástæður. Gert er ráð fyrir að skrár einstakra landa verði samtengdar til að auðvelda samvinnu í baráttunni gegn hryðjuverkum.