Fjarskiptatilskipunin eða Kóðinn - 32018L1972

EECC-tilskipunin/Kóðinn leysir af hólmi gildandi samevrópskt fjarskiptaregluverk (upprunalega frá 2002). Gildistaka miðast við desember 2020. Frumvarp til nýrra laga um fjarskipti, til innleiðingar á nýja fjarskiptapakkanum, var lagt fram á Alþingi í maí 2020 (þskj. 1354 - 775. mál á 150. lögþ.), en náði ekki fram að ganga. Fyrirhuguð er endurframlagning í upphafi 151. lögþ.

Kóðinn skiptist í fjóra hluta (Parts I-IV). I. hluti lýtur að umgjörðinni/almennum reglum um skipulagningu fjarskiptageirans. Þ.m.t. stofnanaumgjörð, almennar heimildir, upplýsingaöflun og samráðsfyrirkomulag, verklagsreglur sem m.a. miða að samræmdri framkvæmd á innri markaðnum (s.s. við úthlutun tíðniheimilda, stöðlun og um beitingu úrræða), öryggi neta/þjónustu o.fl. II. hluti lýtur að netum/netkerfum. M.a. er vikið að gjaldtöku, aðgengisrétti/kröfum um samnýtingu aðstöðu, stýringu og skilyrðum fyrir aðgengi að/notkun á fjarskiptatíðnirófi, dreifingu og notkun þráðlauss netbúnaðar, markaðsgreiningum og aðgangskvöðum. III. hluti snýr að þjónustu. Hann skiptist í þrjá kafla; um alþjónustukvaðir, númeraskipulag og réttindi endanotenda. IV. hluti geymir lokaákvæði. Alls fylgja EECC 13 viðaukar. Vekja má athygli á þeim síðasta (nr. XIII), þar sem greinir samanburðartöflu (eldri samevrópskar reglur á þessu sviði andspænis nýjum).

Kóðinn er svonefnt „recast“ eða uppfærsla á eldri gerðum; hún leysir af hólmi eldri gerðir en felur þó í sér allnokkrar breytingar á gildandi efnisreglum. Þ.m.t. gildissvið og lykilhugtök. Áhersla er á skýra stefnumótun og framkvæmd í sérhverju ríki að því er varðar hagkvæma uppbyggingu háhraðaneta. Hún geymir ný ákvæði um eftirlit og stofnanafyrirkomulag á fjarskiptamarkaði, hér á landi eru ítarleg viðurlagaákvæði og -heimildir til handa Póst- og fjarskiptastofnun einkum nýjung í því samhengi. Loks má nefna að neytendavernd er í brennidepli; áhersla á aukið aðgengi að upplýsingum og samanburði á verði og gæðum fjarskiptaþjónustu, svo og stöðlun viðskiptaskilmála. Um nánari lýsingu á helstu breytingum sem innleiðing Kóðans krefst á gildandi innlendri löggjöf vísast til frumvarps til nýrra laga um fjarskipti (þskj. 1354 - 775. mál á 150. lögþ.), kafla 3 í greinargerð (fyrirhuguð er endurframlagning, með vísan í framanritað).