32018R0456

Drögin varða viðbót við reglugerð (ESB) nr. 2015/2283, sem setur reglur um markaðssetningu og notkun á nýfæði innan Evrópusambandsins.

Í 4. gr. reglugerðarinnar 2015/2283 er mælt fyrir um grundvallarreglur um málsmeðferð við ákvörðun á stöðu nýfæðis. Í samræmi við 1. mgr. þeirrar greinar skulu stjórnendur matvælafyrirtækja ganga úr skugga um hvort matvæli sem þeir hyggjast setja á markað innan Evrópusambandsins falli undir gildissvið reglugerðarinnar, þ.e.a.s. hvort viðkomandi matvæli teljist vera nýfæði.

Ef stjórnendur matvælafyrirtækja eru óvissir um hvort matvæli, sem þeir hyggjast setja á markað falla undir gildissvið nýfæðisreglugerðarinnar skal senda beiðni um álit til aðildarríkis þar sem á að markaðssetja matvælin um hvort þau teljist nýfæði. Stjórnendur matvælafyrirtækja skulu veita aðildarríkinu nauðsynlegar upplýsingar til að gera því kleift að taka ákvörðun um hvort matvæli falla undir gildissvið reglugerðar 2015/2283. Upplýsingar um slíkar beiðnir skulu gerðar opinberar.

Í drögunum er kveðið á um hvaða upplýsingar þurfa að fylgja umsóknum, hvaða tímafrestir gilda og hvernig aðildarríkjum ber að svara slíkum umsóknum og jafnframt um hlutverk framkvæmdastjórnarinnar í þessu ferli.