32018R0502

Almennt: Um er að ræða breytingar á framkvæmdareglugerð framkvæmdastjórnar ESB 2016/799 um framkvæmd reglugerðar Evrópuþingsins og ráðsins (EB) nr. 165/2014. Í þeirri reglugerð er mælt er fyrir um kröfur til smíði, prófunar, uppsetningar, virkni og viðgerða ökurita og íhluta þeirra. Breytingarnar sem verða með reglugerð 2018/502 eru um snjallökurita. Reglugerð 2018/502 tók gildi í Evrópusambandinu 17. apríl 2018.
Í reglugerð 2018/502 er reglugerð ESB 2016/799 breytt í samræmi við kröfur í 8., 9. og 10. gr. reglugerðar ESB nr. 165/2014. Þar er þess krafist að ökuritar sem settir eru í ökutæki sem skráð eru í fyrsta sinn 15. júní 2019 eða síðar skuli vera snjallökuritar. Breyta þarf framkvæmdareglugerð ESB 2016/799 þannig að tæknileg ákvæði sem mælt er fyrir um í henni gildi frá þeim degi.
Aðdragandi: Í reglugerð ESB nr. 165/2014 er fjallað um snjallökurita, um aðra kynslóð stafrænna ökurita með tengingu við hnattrænt gervihnattaleiðsögukerfi (GNSS), um tengingar við búnað til snemmgreiningar með fjartengingu og um möguleika á að ökuritar séu búnir stöðluðum skilflötum við skynvædd flutningakerfi.
Efnisútdráttur: Í reglugerðinni er kveðið á um breytingar á tæknilegum kröfum um smíði, prófun, uppsetningu, virkni og viðgerðir ökurita og íhluta þeirra sem fram koma í reglugerð ESB 2016/799. Breytingarnar eru gerðar vegna kröfu í reglugerð ESB nr. 165/2014 um að ökuritar sem settir eru í ökutæki sem skráð verða fyrstu skráningu 15. júní 2019 eða síðar skuli vera snjallökuritar.
Þá er, vegna kröfu í reglugerð ESB nr. 165/2014 um að staðsetning ökutækis skuli sjálfkrafa skráð á þriggja klukkustunda fresti í samanlögðum aksturstíma, accumulated driving time, nauðsynlegt að gera breytingu á reglugerð ESB 2016/799. Breytingin felur í sér að upplýsingar um staðsetningu ökutækis verði skráðar á þriggja klukkustunda fresti með mæligildi sem ekki er hægt að endurstilla. Breytingin á að koma í veg fyrir að ruglað sé saman ofangreindu hugtaki við hugtakið samfelldur hámarksaksturstími, contiuous driving time, sem er mæligildi með aðra virkni.
Þessu til viðbótar er í reglugerðinni einnig kveðið á um að skráningarhluti ökurita geti verið ein eining eða nokkrar einingar sem dreifðar eru um ökutækið. Búnaðurinn fyrir hnattræna gervihnattaleiðsögukerfið (GNSS) og sérhæfðu skammdrægu fjarskiptin (DSRC) getur því verið innbyggður í ökutækið eða bætt við það. Ef búnaðinum er bætt við verður að vera hægt að framkvæma gerðarviðurkenningu á ökutækinu og búnaðinum sem íhlut til að samræma gerðarviðurkenningarkerfið að þörfum markaðarins.
Reglugerðin hefur ekki áhrif á ákvæði tilskipunar Evrópuþingsins og ráðsins 2014/53/ESB um samræmingu laga aðildarríkjanna um að bjóða þráðlausan fjarskiptabúnað fram á markaði og niðurfellingu á tilskipun 1999/5/EB.
Umsögn: Þær breytingar sem fram koma með reglugerðinni snúa að framleiðendum ökutækja og skyldu þeirra til að seta snjallökuritar í ökutæki sem skráð verða fyrstu skráningu 15. júní 2019 eða síðar. Þar sem engir bílaframleiðendur eru á Íslandi hefur gerðin lítil sem engin áhrif hér á landi eins og stendur. Kostnaður við innleiðingu þessarar reglugerðar er metinn óverulegur sem enginn.