Tilskipun um höfundarétt í hinum stafræna innri markaði - 32019L0790

Tilskipun 2019/790/ESB um höfundarétt í hinum stafræna innri markaði á að samræma ýmsar reglur um höfundarétt sem varða hinn stafræna innri markað. Hún kveður á um undanþágur og takmarkanir á einkarétti höfunda sem eiga að tryggja jafnvægi á milli hagsmunaaðila. Þar ber helst að nefna undanþágu til að tryggja texta- og gagnanám, not höfundaréttarvarins efnis vegna kennslu á netinu og ákvæða sem eiga að tryggja varðveislu menningararfsins. Þá er að finna ákvæði sem eiga að tryggja not menningarstofnana að höfundaréttarvernduðum verkum í þeirra umsjá sem eru ekki lengur fáanleg á almennum markaði (e. out-of-commerce). Þá er að finna ákvæði vegna netnotkunar á greinum dagblaða og fréttaveitna, um rétt útgefenda til hlutdeildar í tekjum vegna nota verka sem nýtt eru skv. undanþágum frá höfundarétti, um skyldu stærri þjónustuveitenda efnisdeilingar á netinu (t.d. Google og Facebook) til að tryggja að samningar við rétthafa um not af verkum þeirra séu virtir og til að tryggja að rétthafar geti bannað not ákveðinna verka á þjónustusvæði þjónustuveitenda og að lokum er að finna ákvæði sem eiga að tryggja sanngjarnt endurgjald til höfunda og flytjenda í útgáfusamningum.