Reglugerð Evrópuþingsins og ráðsins (ESB) um markaðseftirliti með vörum, sem ekki eru matvæli, og falla undir samræmingarlöggjöf ESB. - 32019R1020

Í reglugerðinni eru sett fram ákvæði sem snúa að markaðseftirliti með vörum, sem ekki eru matvæli, og falla undir samræmingarlöggjöf ESB, alls 70 reglugerðir og tilskipanir sambandsins. M.a. eru sett fram ákvæði um hönnun og merkingar, eftirlit á ytri landamærum og ný ákvæði varðandi skyldur rekstraraðila innan sambandsins. Henni er ætlað að styrkja markaðseftirlit og auka samvinnu markaðseftirlitsstjórnvalda, bæði innan einstakra aðildarríkja og milli þeirra, sem og samvinnu markaðseftirlitsstjórnvalda og rekstraraðila og gera einfaldara að ná utan um nýjar aðferðir við markaðssetningu, t.d. á netinu.

Með reglugerðinni eru gerðar verulegar breytingar á reglugerð (ESB) 765/2008 en einnig á tilskipun 2004/42/EC og reglugerð (ESB) 305/2011 um byggingarvörur. Breytingin sem snýr sérstaklega að reglugerð (ESB) 305/2011 um byggingarvörur fjallar um skyldu markaðseftirlitsstjórnvalda til að meta samræmi byggingarvöru, sem fellur undir samhæfðan staðal eða evrópskt tæknimat hefur verið gefið út fyrir, við ákvæði reglugerðarinnar, hafi þau ástæðu til að ætla að varan sé ekki í samræmi við yfirlýst nothæfi og geti valdið hættu. Um er að ræða breytingu á 1. mgr. 56. gr. reglugerðar nr. 305/2011 sem er birt sem fylgiskjal með lögum um byggingarvörur.

Með reglugerðinni eru einnig gerðar kröfur til framfylgdarúrræða eftirlitsstjórnvalda, sbr. ákvæði V. kafla reglugerðarinnar. Framfylgdarúrræði laga um öryggi vöru og opinbera markaðsgæslu nr. 134/1995 uppfylla ekki að öllu leyti þær kröfur sem gerðar eru í V. kafla reglugerðarinnar. Ljóst er að breyta þarf lögunum til að reglugerðin teljist réttilega innleidd í íslensk lög.

Með reglugerðinni eru einnig gerðar kröfur til tollayfirvalda að því marki sem þau fara með markaðseftirlit með öryggi vöru á landamærum. Ljóst er að breyta þarf 130. gr. tollalaga vegna þessa.