32020D0667

Markmið: Með því að breyta þessum þremur ákvörðunum ætlar Evrópusambandið að styðja við innleiðingu á 5G farnetsins í Evrópu.
Gerðirnar sem verið er að breyta: Með ákvörðunum framkvæmdastjórnarinnar 2012/688/EU og 2008/477/EC eru samhæfð tæknileg atriði fyrir notkun 2 GHz tíðnisviðsins annars vegar og hins vegar 2,6 GHz tíðnisviðsins fyrir háhraða breiðbandsþjónustu. Með ákvörðun framkvæmdastjórnarinnar (EU) 2019/784 voru samhæfð tæknileg skilyrði fyrir því að hægt væri að bjóða fram og tryggja hagkvæma nýtingu svonefnds 26 GHz tíðnisviðs fyrir þráðlausa breiðbandsþjónustu.
Ákvarðanirnar hafa haft gildi hér á landi og hefur Póst- og fjarskiptastofnun vísað til þeirra í tíðnitöflu á heimasíðu sinni.
Aðdragandi og efnisatriði: Radio Spectrum Policy Group (RSPG) hafði lagt sérstaka áherslu á það í álitum sínum sem og í vegvísum, annars vegar frá 2016 og hins vegar frá 2019, að til þess að 5G innleiðingin í Evrópu gengi sem best fyrir sig væri mikilvægt að tryggja að sá hluti af tíðnisviðunum 2 GHz og 2.6 GHz sem þegar væri í notkun fyrir farnet yrði tæknilega hæfur til notkunar fyrir 5G farsímatæknina.
Í greinagerð með þessum tveimur ákvörðunum, þ.e. þeim sem nota á til að breyta annars vegar 2012/688/EU og hins vegar 2008/477/EC, eru jafnframt tekin fram atriði sem þurfa að vera til staðar til þess að hægt sé að nota þær fyrir 5G-tæknina. Í fyrsta lagi að viðeigandi lagarammi um tíðnisviðin sé til staðar. Í öðru lagi að ríkin geri viðeigandi ráðstafanir til þess að tíðnisviðin verði samnýtt með núverandi notkun sé þörf á því. Í þriðja lagi að ríkin geri viðeigandi ráðstafanir, eftir atvikum með samráði við hagsmunaaðila, svo hægt verði að leyfa notkun tíðnisviðsins í samræmi við ákvarðanirnar. PFS tekur fram að allar nauðsynlegar ráðstafanir hafa þegar verið gerðar svo hægt sé að framfylgja þeim breytingum sem felast í þessum tveimur ákvörðunum.
Í hnotskurn verða breytingarnar sem verða með þessum tveimur ákvörðunum þær að 5G tækni verður hægt að nýta á tíðnisviðum sem eldri farnetstækni er notuð á í dag t.d. 4G og 3G. 5G farsímatækni mun þá geta verið samhliða eldri tækni á þessum tíðnisviðum án þess að það trufli eða skaði eldri tækni.
Sé litið til þeirrar gerðar sem nota á til að breyta ákvörðun 2019/784 er það að segja að tíðnisviðið 26 GHz var samræmt á heimsvísu árið 2019. Það var gert með breytingum á radio reglugerðum Alþjóðafjarskiptasambandsins (ITU-R). Með þeim breytingum voru sett tvö viðmið um afl (dBW) til að vernda 23,6-24 GHz tíðnisviðið sem notað er til veðurathugana, e. earth exploration satellite service - EESS (passive). Gert var ráð fyrir að fyrra viðmiðið gilti ákveðinn tíma en síðan yrði kveðið á um lækkun á leyfilegu afli. Sú breyting er gerð með þessari tilteknu gerð og seinna viðmiðið hefur því þegar tekið gildi. Ástæðan fyrir því að farið er í breytinguna fyrr en gert var ráð fyrir var ótti um að framleidd yrðu 5G tæki sem uppfylltu fyrra viðmiðið og væru því að nota of mikið afl þegar það seinna kæmi til framkvæmda. Markmiðið með þessu er að vernda enn frekar EESS veðurathugunakerfið (passive).
Segja má að náttúran „noti“ hin ýmsu tíðnisvið. Því verður ekki breytt, enda hluti náttúrunnar. Eitt af þeim tíðnisviðum er þetta 23.6-24GHz. Maðurinn hefur búið til tækni til að mæla tiltekna hluti í veðurfari. Það er gert með því að nema tíðnisendingar náttúrunnar sem verða þegar ákveðnir veðurfarslegir hlutir gerast. Til að trufla ekki þessar tíðnisendingar náttúrunnar sem koma fram á 23.6 – 24GHz tíðnisviðinu og þannig gera veðurfarsmælingar óáræðanlegar verður að setja takmörk á það afl sem mannleg tæki mega nota á tíðnisviðinu við hliðina. Þess vegna eru þessi afl-takmörk sett. Evrópusambandið vill hafa vaðið fyrir neðan sig og flýtir því nú gildistöku strangari reglna sem voru hugsaðar til að tryggja það enn frekar að engar truflanir yrðu inn á tíðnisviðið 23.6 – 24GHz sem náttúran notar
Þá er það tekið fram í greinargerðinni að það verði óheimilt að setja upp ný farnetskerfi sem nýta 22-23.6 GHz tíðnisviðið. Er það í samræmi við niðurstöðu World Radiocommunication Conference 2019 (WRC-19) um að ekki skuli nýta tíðnisviðið fyrir neðan 23.6 GHz fyrir háhraða farnetsþjónustu.
Áhrif hér á landi: Þær breytingar sem af þessum gerðum hljótast eru jákvæðar og í samræmi við það sem stefnt hefur verið að hér á landi. Engar fjárhagslegar skuldbindingar fylgja gerðunum.
Lagastoð fyrir upptöku og innleiðingu: Lagastoð er í 62.gr. laga um fjarskipti, nr 81/2003 og c-liður 3.gr. laga um PFS. Innleiðing fer fram með uppfærslu á opinberu tíðniskipulagi sem Póst- og fjarskiptastofnun birtir á heimasíðu sinni.