32020D1426

Snjallkerfum í umferð - Intelligent transportation systems, ITS - er ætlað að vera upplýsingaflæði- og samskipti við samgöngumannvirki og farartæki og bæta umferðarflæði. Kerfunum er jafnframt ætlað að koma í veg fyrir að hættulegar umferðaraðstæður myndist og þannig fækka óhöppum. Með þessum hætti mynda kerfin samþætta nálgun í umferðaröryggismálum.
Með ákvörðun framkvæmdastjórnar ESB 2008/671/EC um að ITS yrði ráðstafað bili á tíðnisviðinu staðfesti ESB hlutverk kerfanna sem samþættrar nálgunar á umferðaröryggi. Þegar ákvörðunin var innleidd hér á landi skilgreindi Póst- og fjarskiptastofnun tíðnisviðið 5 875 - 5 905 MHz fyrir öryggistengd forrit ITS. Stofnunin tók þetta bil tíðnisviðsins frá í því tíðniskipulagi sem stofnunin gerir fyrir Ísland. Það tíðniskipulag er birt á heimasíðu stofnunarinnar.
Með hinni nýju ákvörðun er ætlunin að stækka bil tíðnisviðsins fyrir öryggistengd forrit ITS upp í 5 935 MHz. Það var gert í tengslum við áætlun ESB um gigabit væðingu og innleiðingu 5G í álfunni. Einnig var talið að með aukinni áherslu á umferðaröryggi talin þörf á að vernda umrætt 5.9 GHz tíðnibandið fyrir skaðlegum truflunum. Þá var ákveðið að útvíkka skilgreininguna á ITS þannig að hún tæki til fleiri farartækja en áður. Þar má nefna járnbrautalestir en snjallkerfi sem notuð voru fyrir ITS í járnbrautarsamgöngum nýttu þegar tíðnisviðið fyrir ofan 5 905 MHz.
Póst og fjarskiptastofnun hefur metið gerðina og sér ekkert því til fyrirstöðu að ákvörðunin verði innleidd hér á landi. Tíðnisvið sem stækkunin tekur til er ekki bundið í notkun hér. Stofnunin gerir því engar athugasemdir við þá breytingu sem þarna er lögð til.
Stofnunin telur engar fjárhagslegar skuldbindingar felast í innleiðingu þessarar breytingar.
Innleiðing verður gerð með því að opinbert tíðniskipulag sem stofnunin birtir á heimasíðu sinni verður uppfært þannig að vísað verður til hinnar nýju ákvörðunar þegar hún hefur verið tekin upp í EES-samninginn.
Lagastoð er að finna í 1. mgr. 14 gr. fjarskiptalaga, um skipulag og úthlutun tíðna.