32020R0217

Að gefnu áliti sem gefið er út af áhættumatsnefnd (RAC) hjá Efnastofnun Evrópu (ECHA) og athugasemdum sem berast frá hlutaðeigandi aðilum hvað það varðar, er samræmd flokkun og merking tiltekinna efna sett fram, uppfærð, breytt, eða eytt í töflu 3 í 3. hluta VI. viðauka við reglugerð (EB) nr. 1272/2008. Að auki þarf að setja inn samræmd gildi bráðra eiturhrifa (ATE) fyrir tiltekin efni í töfluna. Leiðrétta þarf ennfremur ranga samræmda flokkun og merkingu á biki úr háhitakoltjöru í reglugerð Framkvæmdastjórnarinnar (ESB) nr. 2018/669, áður en sú reglugerð tekur gildi þann 1. desember 2019.

Tekið var tillit til athugasemda sem lagðar voru fram innan ramma almenningsráðgjafar hlutaðeigandi aðila um drög að reglugerð framkvæmdastjórnarinnar varðandi efnin, í samræmi við 4. mgr. 37. gr. í reglugerð (EB) nr. 1272/2008. Athugasemdirnar sem bárust, aðallega frá ýmsum samtökum úr atvinnulífinu, snerust um þrjú af 28 efnum reglugerðarinnar, þ.e. títanoxíð (TiO2), kóbalt og DTPA.

Framkvæmdastjórnin komst að þeirri niðurstöðu að athugasemdir varðandi efnin TiO2 og kóbalt réttlættu ekki breytingu á drögum að reglugerð framkvæmdastjórnarinnar, þar sem engar nýjar, veigamiklar upplýsingar komu þar fram sem kynnu að fara í bága við vísindaálit áhættumatsnefndarinnar.

Að því er varðar athugasemdir um DTPA komst framkvæmdastjórnin að þeirri niðurstöðu að þær gæfu tilefni til að breyta drögum að reglugerðinni varðandi það efni, einkum hvað varðar flokkun þess sem eiturefnis gagnvart æxlun í flokki 1B, en færslunni um það hefur verið eytt um sinn, í ljósi nýrra vísindalegra upplýsinga sem lagðar voru fram.

Með reglugerðinni er reglugerð (EB) nr. 1272/2008 breytt og leiðrétt í samræmi við viðauka þessarar reglugerðar.