Reglugerð (ESB) 2020/2084 um breytingu á reglugerð (ESB) 2018/2067 um vottun og faggildingu (AVR). - 32020R2084

Framkvæmdarreglugerð framkvæmdastjórnarinnar (ESB) 2020/2084, sem hér er til greiningar, var sett til breytinga og leiðréttinga á framkvæmdarreglugerð framkvæmdastjórnarinnar (ESB) 2018/2067 um vottun og faggildingu innan viðskiptakerfis ESB með losunarheimildir (hér eftir skammstöfuð AVR), sem sett er á grundvelli 15. gr. tilskipunar 2003/87/EB.
Helstu breytingarnar sem felast í reglugerð þessari eru eftirfarandi:

• Breytingar eru gerðar til að samræma reglurnar í AVR við reglugerðir (ESB) 2019/331 og reglugerð (ESB) 2019/1842, m.a. til að fella reglur um vottun á skýrslum um
starfsemisstig (e. annual activity level report) sem settar eru fram með reglugerð (ESB)2019/1842, inn í AVR, ásamt fleiri atriðum tengdum breytingum á starfsemisstigi.

• Breytingar eru gerðar á AVR til samræmis við samræmda staðla sem eru endurskoðaðir reglulega.

• Reglurnar í 4. gr. AVR um fyrirframætlað samræmi eru skýrðar nánar.

• Samkvæmt reglugerðum (ESB) 2019/331 og 2019/1842 skal áætlun um aðferðafræði vöktunar (e. monitoring methodology plan) innihalda viðeigandi ákvæði um vöktun þegar
rekstraraðilar sækja um endurgjaldslausar losunarheimildir skv. 10. gr. a tilskipunar 2003/87/EB. Því er ekki lengur viðeigandi að kveða á um vottun á þeim þáttum sem skipta
máli fyrir úthlutun endurgjaldslausra losunarheimilda á grundvelli vöktunaráætlunar (e. monitoring plan) samkvæmt AVR.

• Breytingar eru gerðar á reglum um aðgengi lögbærs stjórnvalds að innri sannprófunargögnum (e. internal verification documentation) til þess að tryggja að mat á vottun eigi sér
stað innan þess tímaramma sem lögbært stjórnvald ákveður, sbr. 3. mgr. 26. gr. AVR.

• Reglur um hæfi vottunaraðila sem óska eftir faggildingu eru skýrðar nánar til að stuðla að frekari samræmingu innan Sambandsins og bæta skilvirkni faggildingarkerfisins, sbr.
22.-26. tölul. 1. gr. reglugerðar þessarar. Einnig er skilgreiningu á hugtakinu „vottunaraðila“ breytt. Áður féll bæði lögaðili (e. legal person) og annar lögformlegur aðili
(e. another legal entity) undir skilgreininguna en „annar lögformlegur aðili“ hefur verið tekinn út, sbr. 3. tölul. 3. gr. AVR.

• Sett er nýtt ákvæði með 34. gr. a AVR, sbr. 21. tölul. 1. gr. reglugerðar þessarar, um heimild til fjarvottunar þegar um alvarlegar, óvenjulegar og ófyrirsjáanlegar aðstæður
(Force Majeure) er að ræða, sem valda því að vottunaraðili getur ekki uppfyllt skyldu sína um vettvangsheimsókn í vottunarferlinu. Skal ákvörðun vottunaraðila um fjarvottun
byggja á áhættumati þar sem farið er sérstaklega yfir þá áhættuþætti sem geta falist í fjarvottun og skal vottunaraðili gera allt sem í hans valdi stendur til að lágmarka
áhættuna. Skilyrði er að viðkomandi rekstraraðili eða flugrekandi afli samþykkis lögbærs stjórnvalds fyrir fjarvottun og að áhættumat sé lagt fram. Ef vottunaraðili er af
einhverjum ástæðum ekki sáttur við fjarvottunarferlið eða niðurstöðu þess skal vettvangsheimsókn fara fram svo fljótt sem kostur er. Vegna covid-19 heimsfaraldursins hefur
Umhverfisstofnun veitt heimild til fjarvottunar skv. nýrri 34. gr. a AVR þrátt fyrir að reglugerð þessi hafi ekki verið innleidd hér á landi. Þetta hefur verið gert til að
tryggja jafnræði milli flugrekenda og rekstaraðila innan ETS-kerfisins í Evrópu, enda er vettvangsheimsókn vottunaraðila í sumum tilvikum ómöguleg á þessum tímum.

• Gerðar eru breytingar á 41. gr. AVR sem fjallar um verklagsreglur vottunaraðila þar sem settur er fram listi yfir innihald stjórnunarkerfisins þar sem vottunaraðili þarf að
hafa upplýsingar um stefnur og ábyrgð, yfirferð stjórnenda, innri úttektir, úrbætur, aðgerðir til að takast á við áhættu og tækifæri, fyrirbyggjandi aðgerðir og stjórnun
skjalakerfa, sbr. 24. tölul. 1. gr. reglugerðar þessarar. Þessi listi er nýr og rammar verklagsreglur vottunaraðila enn frekar inn og gefur þeim aukið vægi.

• Gerðar eru breytingar á 43. gr. AVR sem fjallar um hlutleysi og sjálfstæði vottunaraðila þar sem því er bætt við að vottunaraðili skuli hafa áhættuna á óhlutdrægni í huga
þegar sami flugrekandi eða rekstraraðili er vottaður annað árið í röð, og gera ráðstafanir til að draga úr þeirri áhættu, sbr. 26. tölul. 1. gr. reglugerðar þessarar. Einnig
er nýrri 8. mgr. bætt við 43. gr. AVR varðandi tíðni vottana af hendi sama aðalvottunaraðila (e. lead verifier) sem felur í sér að ef sami aðalvottunaraðili framkvæmir árlega
vottun í fimm ár samfellt fyrir tiltekna starfsstöð, skuli sá vottunaraðili taka hlé í þrjú ár samfleytt frá því að votta sömu starfsstöð. Fimm ára hámarkstímabilið felur í
sér vottun á losun eða úthlutunargögnum tiltekinnar starfsstöðvar frá og með 1. janúar 2021.

• Einnig eru með reglugerð þessari gerðar ýmsar tæknilegar leiðréttingar á AVR, s.s. þar sem rétt númer reglugerða (ESB) 2019/331 og 2019/1842 eru sett inn.

Reglugerð þessi tók gildi innan ESB 1. janúar 2021.