Ákvörðun um skýrslugjöf um umfang endurnotkunar. - 32021D0019

Í ákvörðuninni og viðauka hennar er fjallað um hvernig ríki skulu standast skyldur sem settar eru fram í 7. tl. 9. gr. og í 7. tl. 37. gr. í rammatilskipun ESB um úrgang (2008/98) er snýr að skýrslugjöf um endurnotkun í ríkjum ESB.

Í 7. tl. 37. gr. rammatilskipunar um úrgang (2008/98) er kveðið á um að ríkjum sé skylt að skila skýrslum til ESB um endurnotkun í landinu í samræmi við ákvörðun sem framkvæmdarstjórnin skuli setja fram. Hér er um að ræða þá ákvörðun.

Samkvæmt 37. gr. skulu aðildarríki skila slíkum skýrslum árlega innan 18 mánaða frá því ári sem skýrslan nær yfir og skal þessi skýrslugjöf hefjast á fyrsta heila ári eftir að ákvörðun þessi hefur verið innleidd innan sambandsins. Miðað við að ákvörðunin sé til umræðu núna má ætla að hún verði samþykkt síðar á árinu og þ.a.l. má ætla að fyrstu skýrsluskil skuli liggja fyrir eigi síðar en 30. júní 2024 miðað við gögn fyrir árið 2022.

Í ákvörðuninni kemur fram að megindlegar (e. quantitative) skýrslur skuli gerðar fyrir 3ja hvert ár, en eigindlegar (e. qualitative) á hverju ári til að einfalda aðildarríkjum skýrslugjöfina.

Skv. 2. gr. ákvörðunarinnar er aðildarríkjum skylt að notast við viðauka sem settur er fram með ákvörðuninni.

Í viðaukanum er sett fram aðferðarfræði og sú tafla sem skila skal til sambandsins. Áherslan er aðallega á 4 flokka, textíl, raf- og rafeindatæki, húsgögn, byggingarefni og vörur.