Ákvörðun Framkvæmdastjórnarinnar um að færa inn landsbundnar úthlutunartöflur vegna flugs fyrir aðildarríki EES inn í skráningarkerfi með losunarheimildir fyrir árin 2021-2023. - 32021D0210(01)

Í 1. mgr. 28. gr. a tilskipunar 2003/87/EB er kveðið á um tímabundna undanþágu á gildissviði tilskipunarinnar hvað varðar flug til og frá flugvöllum í löndum utan EES svæðisins og frá flugi milli EES og ystu svæða og á milli ystu svæða fyrir tímabilið 2013 til 2023. Ennfremur er kveðið á um í 2. mgr. sömu greinar að flugrekendur fái úthlutað endurgjaldslausum losunarheimildum sem fer fækkandi í hlutfalli við minnkað gildissvið.

Framkvæmdastjórn Evrópusambandsins hafði fyrirskipað miðlægum stjórnanda viðskiptadagbókar Evrópusambandsins með fyrri ákvörðunum að færa inn landsbundnar úthlutunartöflur vegna flugs fyrir aðildarríkin fyrir árin 2013-2016 og fjöldi endurgjaldslausra losunarheimilda fyrir 2017-2023 var birtur af aðildarríkjum þann 1. september 2018 skv. 2. mgr. 28. gr. a tilskipunar 2003/87/EB. Þessum töflum var hlaðið upp í skráningarkerfið til og með árinu 2020 en ekki var unnt að hlaða úthlutunartöflum eftir þann tíma þar sem virkni skráar Sambandsins leyfði það ekki á þeim tíma.

Sama málsgrein, þ.e.a.s. 2. mgr. 28. gr. atilskipunar 2003/87EB kveður á um að fjöldi endurgjaldslausra losunarheimilda skuli vera háður línulegum lækkunarstuðli sem um getur í 9. gr. tilskipunarinnar, en í þeirri grein segir að hann skuli vera 2,2% frá og með árinu 2021.

Vegna útgöngu Bretlands úr ESB eru flug frá, innan eða til flugvalla í Bretlandi ekki háð skýrsluskilum og reglufylgni frá árinu 2021, í kjölfar tímabundinnar undanþágu sem fram kemur í 1. mgr. 28. gr. a tilskipunar 2003/87/EB. Í kjölfarið þarf því að endurskoða fjölda endurgjaldslausra losunarheimilda í samræmi við minnkað gildissvið fyrir árin 2021-2023, þ.e.a.s. þar sem að flug til og frá Bretlandi eru ekki lengur innan gildissviðs ETS- kerfisins.

Belgía, Búlgaría, Kýpur, Tékkland, Danmörk, Þýskaland, Eistland, Írland, Grikkland, Spánn, Frakkland, Króatía, Ísland, Ítalía, Lettland, Litháen, Lúxemborg, Ungverjaland, Malta, Holland, Noregur, Austurríki, Pólland, Portúgal, Rúmenía , Slóvenía, Slóvakía, Finnland og Svíþjóð tilkynntu framkvæmdastjórninni um landsbundnar úthlutunartöflur sínar fyrir flug, og telur framkvæmdastjórnin að þessar töflur séu í samræmi við 28. gr. a tilskipunar 2003/87/EB og því þarf miðlægi stjórnandinn að gera samsvarandi breytingar í skrá Sambandsins.

Eina grein þessarar ákvörðunar fjallar því um að miðlægi stjórnandinn skuli færa innlendar landsbundnar úthlutunartöflur vegna losunar frá flugi fyrir Belgíu, Búlgaríu, Kýpur, Tékkland, Danmörku, Þýskaland, Eistland, Írland, Grikkland, Spán, Frakkland, Króatíu, Ísland, Ítalíu, Lettland, Litháen, Lúxemborg, Ungverjaland, Möltu, Holland, Noreg, Austurríki, Pólland, Portúgal, Rúmeníu, Slóveníu, Slóvakíu, Finnland og Svíþjóð, með lokaupphæð úthlutunar árlegra endurgjaldslausra losunarheimilda fyrir tímabilið 2021 til 2023 sem fram kemur í viðauka I við ákvörðun þessa, inn í viðskiptadagbók Evrópusambandsins. Úthlutunin hefur verið lækkuð í samræmi við línulegan lækkunarstuðul og minnkað gildissvið .

Ákvörðunin snýr einnig að Íslandi og Noregi án þess að Eftirlitsstofnun EFTA (ESA) hafi komið þar að, líklega vegna mistaka. 3. mgr. 55 gr. reglugerðar (ESB) nr. 389/2013 um stofnun skrár Sambandsins fjallar um að framkvæmdastjórnin skuli gefa miðlæga stjórnandanum fyrirmæli um breytingar á töflunni yfir landsbundna úthlutun vegna flugs, eins og þessi breyting snýr að, en í ákvörðun sameiginlegu EES nefndarinnar nr. 59/2014 þar sem reglugerðin var tekin upp í EES-samninginn var gerð sú aðlögun við 3. mgr. 55. gr. að þegar um sé að ræða töflur aðildarríkja EFTA um úthlutun skuli Eftirlitsstofnun EFTA gefa yfirstjórnandanum fyrirmæli.
Umhverfisstofnun hefur bent ESA á þessi mistök og er málið í skoðun þar.