Ákvörðun um upplýsingagjöf varðandi notkun seyru - 32021D2252

Ákvörðunin varðar breytingu á ákvörðun framkvæmdastjórnarinnar nr. 94/741/ESB sem fjallar um  upplýsingagjöf sem varðar  tilskipun 86/278/ESB um verndun umhverfisins, einkum jarðvegs, þegar seyra frá skólphreinsistöðvum er notuð í landbúnaði.   Ákvörðun 94//741 var innleidd í EES samninginn með ákvörðun  Sameiginlegu EES-nefndarinnar nr. 47/96. Ákvörðunin er innleidd í íslenska löggjöf með reglugerð nr. 799/1999 um meðhöndlun á seyru þar sem í  15. gr. eru sett fram ákvæði um skráningu og skil á gögnum. Í þeirri grein er þegar kveðið á um að skila eigi gögnum um magn seyru sem notuð er til landbúnaðarþarfa og notkunarstað. Einnig er gert ráð fyrir að Umhverfisstofnun láti heilbrigðisnefndum í té þar til gerð eyðublöð til að svara spurningunum.Umhverfisstofnun og heilbrigðisnefndir hafa hingað til tekið saman gögn um seyru undir reglugerð nr. 798/1999 um fráveitur og skólp sem er ekki jafn ítarleg skráning og óskað er í ákvörðun ESB nr. 94/741/ESB. Í dag er afar lítilli seyru safnað á Íslandi en með aukinni hreinsun og nýtingu seyru verður frekar tilefni til að fylgjast betur með magni og notkun.Umhverfisstofnun telur ekki þörf á að breyta reglugerð nr. 799/1999 þar sem þar séu þegar ákvæði sem stofnunin getur notað til að kalla eftir þessum upplýsingum.