32021R0345

Virkt klór myndað úr natríumklóríði með rafgreiningu hefur verið metið til notkunar í sæfivörur í vöruflokkum 2, 3, 4 og 5 eins og þeir eru skilgreindir í V. viðauka við tilskipun Evrópuþingsins og ráðsins 98/8/EB, sem samsvarar vöruflokkum 2, 3, 4 og 5 eins og þeir eru skilgreindir í V. viðauka við reglugerð (ESB) nr. 528/2012.

Slóvakía sem lögbært matsyfirvald skilaði matsskýrslum til framkvæmdastjórnarinnar ásamt niðurstöðum þann 19. nóvember 2010. Sæfivörunefndin samþykkti álit Efnastofnunar Evrópu þann 16. júní 2020 sem byggði sitt álit á matsskýrslum lögbæra matsyfirvaldsins.

Samkvæmt áliti Efnastofnunarinnar má ætla að sæfivörur í vöruflokkum 2, 3, 4 og 5 sem nota virkt klór myndað úr natríumklóríði með rafgreiningu uppfylli kröfurnar eins og mælt er fyrir um í 5. gr. tilskipunar 98/8/EB, að því gefnu að ákveðnum forskriftum og skilyrðum varðandi notkun þeirra sé fylgt. Því er við hæfi að samþykkja efnið til notkunar í sæfivörur í þessum tilteknu vöruflokkum að uppfylltum þeim forskriftum og skilyrðum sem koma fram í viðauka við reglugerðina.

Þau skilyrði sem sett eru í viðauka við reglugerðina ná m.a. til atriða sem sérstaklega skuli huga að við mat á sæfivörunni, s.s. atriði tengd notkun hennar og verndun þess sem notar vöruna í atvinnuskyni og einnig þörfina á að setja ný eða breyta hámarksgildum leifa vöru, sem gæti skilið eftir sig leifar í matvælum eða fóðri.