32021R0369

Með framkvæmdarreglugerð (ESB) 2021/369 er kveðið á um tækniforskriftir og verklagsreglur fyrir samtengingarkerfi skráa samkvæmt 30. og 31. gr. tilskipunar (ESB) 2015/849 um ráðstafanir gegn því að fjármálakerfið sé notað til peningaþvættis eða til fjármögnunar hryðjuverka, eins og henni var breytt með tilskipun (ESB) 2018/843. Framangreind ákvæði tilskipunar (ESB) 2015/849 voru innleidd í íslenskan rétt með lögum um skráningu raunverulegra eigenda, nr. 82/2019. Þannig er kveðið á um það hvernig skrá um raunverulegar eigendur skv. lögum nr. 82/2019 verður samtengd sambærilegum skrám annarra EES-ríkja í gegnum miðlægan vettvang (European Central Platform) sem komið var á fót með tilskipun (ESB) 2017/1132. Jafnframt er í framkvæmdarreglugerðinni kveðið á um það hvaða aðilar skuli hafa aðgang að upplýsingum um raunverulega eigendur lögaðila og fjárvörslusjóða eða sambærilegra aðila í gegnum samteningakerfið og hvaða upplýsingum viðkomandi aðilar skuli hafa aðgang að. Samkvæmt a- og b-lið 5. mgr. 30. gr. og a- og b-lið 4. mgr. 31. gr. tilskipunar (ESB) 2015/849 skal veita lögbærum yfirvöldum og skrifstofum fjármálagreininga lögreglu í aðildarríkjunum aðgang að upplýsingum um raunverulega eigendur lögaðila og fjárvörslusjóða eða sambærilegra aðila án allra takmarkana en tilkynningarskyldum aðilum í skilningi tilskipunarinnar skal veita upplýsingar innan ramma könnunar á áreiðanleika upplýsinga um viðskiptamenn í samræmi við II. kafla hennar.Framkvæmdareglugerð (ESB) 2021/369 kveður þannig á um aðgang lögbærra yfirvalda og skrifstofu fjármálagreiningar lögreglu í EES-ríkjunum sem og tilkynningaskyldra aðila í skilningi tilskipunarinnar, sbr. lög nr. 140/2018 um aðgerðir gegn peningaþvætti og fjármögnun hryðjuverka, að nánar tilgreindum upplýsingum um raunverulega eigendur lögaðila og fjárvörslusjóða og sambærilegra aðila í öðrum EES-ríkjum í gegnum samtengingarkerfið (BORIS).