Listi yfir flugrekendur sem heyra undir umsjá Íslands í viðskiptakerfi ESB með losunarheimildir - 32021R0662

Reglugerð framkvæmdastjórnarinnar (EB) nr. 748/2009 var sett til að uppfylla skyldur framkvæmdastjórnarinnar skv. 3. tl. 18. gr. a tilskipunar 2003/87/EB, eins og henni var breytt með 4. tl. 1. gr. tilskipunar 2008/101/EB. Með reglugerðinni var lögfestur listi yfir flugrekendur sem heyra undir viðskiptakerfi ESB með losunarheimildir auk þess sem tilgreint er hvaða aðildarríki telst umsjónarríki hvers flugrekanda í skilningi tilskipunar 2003/87/EB.

Listinn í viðauka við reglugerðina er miðlægur upplýsingagrunnur um alla flugrekendur sem falla undir gildissvið viðskiptakerfisins. Hann hefur jafnframt það hlutverk að flokka flugrekendur niður á umsjónarríki eftir þeim reglum sem fram koma í fyrrnefndri tilskipun. Reglur um umsjónarríki eru í grófum dráttum þessar: Flugrekendur sem skráðir eru innan EES falla undir það ríki sem gaf flugrekstrarleyfi þeirra út. Flugrekendur frá ríkjum utan EES raðast hins vegar niður á umsjónarríki eftir því hvert má rekja meirihluta af losun þeirra innan viðskiptakerfisins árið 2006.

Í aðfaraorðum reglugerðarinnar kemur fram að lista þessum sé ætlað að draga úr stjórnsýslubyrði flugrekstraraðila og veita upplýsingar til flugrekstraraðila um hvaða aðildarríki muni framfylgja kröfum viðskiptakerfisins gagnvart sér og að hverju aðildarríki sé ljóst hvaða flugrekendum því beri að hafa umsjón með. Tekið er fram í aðfaraorðunum að listanum sé þó ekki ætlað að skera úr um það hvort flugrekandi falli undir gildissvið viðskiptakerfisins, heldur ráðist það eingöngu af gildissviði tilskipunar 2003/87/EB. Ef flugrekandi stundar starfsemi sem fellur undir gildissvið tilskipunarinnar heyrir hann því undir viðskiptakerfið hvort sem hans er getið á listanum eða ekki. Að sama skapi eru flugrekendur sem hafa hætt flugstarfsemi sem heyrir undir gildissvið tilskipunar 2003/87/EB ekki hluti viðskiptakerfisins þótt þeirra sé getið á listanum.
Við þetta bætist síðan að þar sem að aðlögunartímabilinu sem mælt er fyrir um útgöngusamningi um brotthvarf Stóra-Bretlands og Norður- Írlands úr ESB er lokið er Bretland ekki lengur stjórnandi aðilarríkis fyrir flugrekendur innan ETS – kerfisins, og því eru þeir flugrekendur sem áður voru undir umsjá Bretlands færðir yfir í umsjá annarra aðildarríkja, þmt Íslands.

Með reglugerð framkvæmdastjórnarinnar (ESB) 2021/662 er lögfestur nýr viðauki yfir flugrekendur og þeim eldri samkvæmt reglugerð framkvæmdastjórnarinnar (ESB) 2020/535 skipt út fyrir hann.
Samkvæmt þessum nýja viðauka verða 367 flugrekendur í umsjón Íslands, og fjölgar því flugrekendum um 128 talsins á því tímabili en fjöldi þessara flugrekenda var 239 talsins skv. viðauka við reglugerð (ESB) nr. 2020/535. Miðlægi stjórnandi skráningarkerfis ETS hefur þegar sent lista yfir virka flugrekendur sem hafa opin reikning í skráningarkerfinu og eru þeir 26 talsins sem munu bætast við, svo 102 af þessum flugrekendum falla eins og er ekki undir gildissvið tilskipunar 2003/87/EB.