32021R0807

Kalíumsorbat hefur verið metið sem fyrirliggjandi virkt efni úr vinnuáætluninni um kerfisbundna athugun á öllum fyrirliggjandi virkum efnum, sbr. 1. mgr. 89. gr. reglugerðar (ESB) nr. 528/2012 og framkvæmd í samræmi við framselda reglugerð framkvæmdastjórnarinnar (ESB) nr. 1062/2014.

Umsókn um samþykki kalíumsorbats var metin í samræmi við tilskipun 98/8/EB þar sem lögbæra matsyfirvaldið lauk mati sínu þann 20. október 2010. Þann 4. desember 2014 samþykkti sæfivörunefndin álit Efnastofnunar Evrópu eftir að hafa tekið tillit til niðurstöðu lögbæra matsyfirvaldsins. Samkvæmt álitinu má áætla að sæfivörur í vöruflokki 8, sem innihalda kalíumsorbat, uppfylli skilyrði 5. gr. tilskipunar 98/8/EB og þess vegna var kalíumsorbat samþykkt sem virkt efni til notkunar í sæfivörur í vöruflokki 8 með framkvæmdareglugerð (ESB) 2015/1729. Kalíumsorbat er enn í vinnuáætluninni fyrir notkun þess í sæfivörur í vöruflokki 6.

Í álitinu frá 4. desember 2014 var einnig ályktað að kalíumsorbat uppfylli skilyrðin til að mega færast inn í I. viðauka við reglugerð (ESB) nr. 528/2012. Þar sem kalíumsorbat hefur verið metið á grundvelli málsskjala sem hafa verið samþykkt í samræmi við 1. mgr. 11. gr. tilskipunar 98/8/EB er kalíumsorbat fært undir 6. flokk I. viðauka.

Til að tryggja að tímaramminn til að sækja um leyfi sé nægur í samræmi við aðra undirgrein 3. mgr. 89. gr. reglugerðar (ESB) nr. 528/2012 er dagsetning samþykkis fyrir kalíumsorbat, sem virku efni í vöruflokki 6, 1. febrúar 2023.