32021R2030

Efnið N,N-dímetýlformamíð er stórframleiðsluíðefni sem notað er í margs konar iðnaðar- og atvinnustarfsemi í Evrópu. Efnið er notað sem lífrænn leysir og hefur verið hættuflokkað sem efni, sem hefur eiturhrif á æxlun, undirflokkur 1B, bráð eiturhrif, 4. undirflokkur (við innöndun og um húð) og augnerting, 2. undirflokkur, í samræmi við reglugerð (EB) nr. 1272/2008 (CLP).

Lögð voru fram málsskjöl til Efnastofnun Evrópu (ECHA) þann 5. október 2018 af Ítalíu í samræmi við reglugerð (EB) nr. 1907/2006 (REACH). Það var gert í þeim tilgangi að takmarka notkun efnisins í iðnaði og í atvinnuskyni, sem og setja það á markað eitt og sér eða í efnablöndu. Tillagan að takmörkuninni var byggð á hættumati efnisins, þ.e. kerfistengd áhrif þess á nokkra endapunkta, sem leiddi í ljós núlláhrifagildi (DNEL) vegna langtímaáhrifa af innöndun og langtímaáhrifa í gegnum húð. Hættumatið byggðist á gögnum um dýr; lækkun líkamsþyngdar, klínískar efnabreytingar og lifrarskaða.

Áhættumatsnefnd Efnastofnunarinnar (RAC) og nefndin um félagshagfræðilega greiningu (SEAC) skiluðu áliti sínu til stofnunarinnar um að takmörkun á efninu væri mest viðeigandi aðgerðin innan Sambandsins til að minnka áhættu og auka eftirlitsgetu.

Samráð var haft við gagnaskiptatorg vegna framkvæmdar vegna fyrirhugaðrar takmörkunar og voru tillögur torgsins hafðar til hliðsjónar við ákvörðunina.

Þann 1. apríl 2020 skilaði Efnastofnunin áliti RAC og SEAC til framkvæmdarstjórnarinnar og var niðurstaðan sú að áhættunni fyrir heilsu starfsmanna í öllum atvinnugeirum við framleiðslu og notkun efnisins sé ekki nægilega stjórnað. Álit framkvæmdarstjórnarinnar er sú að áhættan sé óviðunandi fyrir starfsfólk vegna váhrifa af efninu og því sé viðeigandi að setja fram takmörkunarskyldu á því á vettvangi Sambandsins. Gefa á hagsmunaaðilum nægan tíma til að fylgja fyrirhugaðri takmörkun og því kemur reglugerðin til framkvæmda 24 mánuðum eftir gildistöku hennar. Búist er við að þær greinar sem koma að framleiðslu á pólýúretanhúðun og himnum sem og gervitrefjaiðnaður þurfi lengri tíma til að fylgja kröfum um núlláhrifagildi vegna váhrifa starfsmanna og því er aðlögunartíminn lengri í þeim tilvikum.

Reglugerðin tekur gildi á 20. degi eftir birtingu hennar í Stjórnartíðindum Evrópusambandsins.