32022R1255

Með dýralyfjareglugerðinni voru settar fram ýmsar ráðstafanir til að berjast gegn sýklalyfjaónæmi, þar á meðal strangar reglur um ávísun dýralækna á sýkingalyfjum. Reglugerðin tilgreinir einnig að óheimilt sé að nota sýkingalyf reglulega eða sem fyrirbyggjandi meðferð, til að bæta upp fyrir lélegt hreinlæti, ófullnægjandi búfjárhald, skort á umönnum eða vegna lélegs búrekstrar. Til að varðveita betur virkni sýkingalyfja og styðja við baráttuna gegn sýklalyfjaónæmi sem er mikil ógn við heilsu jarðarbúa eru tiltekin sýkingalyf eða flokkar þeirra frátekin til meðferðar á tilteknum sýkingum í mönnum. Í framseldri reglugerð framkvæmdastjórnarinnar (ESB) 2021/1760 eru sett fram þau viðmið sem þarf að uppfylla svo sýkingalyf skulu vera frátekin til að meðhöndla tilteknar sýkingar í mönnum í því skyni að viðhalda verkun umræddra sýkingalyfja.Með framkvæmdareglugerð framkvæmdastjórnarinnar (ESB) 2022/1255 eru þau sýkingalyf sem tilgreind eru í viðauka við gerðina frátekin til meðhöndlunar á sýkingum í mönnum. Þau sýkingalyf sem listuð eru í viðaukanum hafa verið metin af Lyfjastofnun Evrópu í samstarfi við fagaðila sem þau sýkingalyf sem uppfylla viðmið reglugerðar (ESB) 2021/1760. Til að gefa aðilum nauðsynlegan tíma til að aðlaga sig að breyttum reglum kemur reglugerðin ekki til framkvæmda fyrr en 9. febrúar 2023.