32023D0423

Framkvæmdastjórn ESB hefur haldið úti tveimur vefsíðum sem snúa að viðurkenningu faglegrar menntunar. Annars vegar er um að ræða gagnagrunn yfir öll lögvernduð störf á innri markaði EES, sjá https://ec.europa.eu/growth/tools-databases/regprof/. Hins vegar upplýsingakerfi innri markaðarins, IMI, sjá https://ec.europa.eu/internal_market/imi-net/index_en.htm.  Fyrri vefurinn (Regulated professionas database) er leitarbær grunnur sem heldur utan um öll störf innan EES sem njóta lögverndunar. Þar er hægt að lesa lýsingu á inntaki starfs, hvaða hættur almannaöryggi stafar af vankunnáttu við iðkun þess (rök fyrir lögverndun), menntun sem krafist er o.fl.  Síðari vefurinn (Internal Market Information System - IMI) er samskiptagrunnur þar sem stjórnvöld á innri markaði EES geta átt samskipti, skipst á upplýsingum þegar kalla þarf eftir skýringum á gögnum er fylgja með umsóknum frá einstaklingum um viðurkenningu faglegrar menntunar, geta tilkynnt nýjar greinar sem falla undir Viðauka V í tilskipun 2005/36/EB (t.d. læknar, hjúkrunarfræðingar, tannlæknar, arkitektar) o.s.frv. IMI skiptir einnig máli varðandi framkvæmd Evrópska fagskírteinisins sem tekið var upp með breytingatilskipuninni 2013/55/ESB og innleitt var með lagabreytingu og reglugerð hér á landi 2020.  Ráðgert er að sameina þessa tvo vefi í einn og var framkvæmdareglugerð ESB um reynsluverkefni fyrir stjórnsýslusamstarf vegna þeirrar breytingar samþykkt 24. febrúar 2023. Textinn er merktur með þýðingu fyrir EES (EEA relevance) og er stefnt að því að taka hann inn í EES-samninginn með ákvörðun sameiginlegu EES-nefndarinnar.  Fyrrnefndu reynsluverkefni er ætlað að leiða í ljós kosti sameiningar þessara tveggja vefja og tekur til hlutverks lögbærra stjórnvalda, samhæfingaraðila og felur í sér ítarlega upptalningu á atriðum sem snúa að tæknilegri virkni hins nýja vefjar. Vefurinn er ómissandi hluti af starfsemi innri markaðarins og borðleggjandi að Ísland sé með í þeirri vegferð eftir því sem kostur er á og eftir er kallað.