Ákvörðun Framkvæmdastjórnar ESB 2023/1575 varðandi heildarfjölda losunarheimilda í ETS kerfinu á árinu 2024. - 32023D1575

Í 9. gr. tilskipunar ESB 2003/87, eins og henni hefur verið breytt með tilskipun ESB 2023/959 kemur fram að framkvæmdastjórn ESB skuli, fyrir 6. september 2023, birta heildarfjölda losunarheimilda (e. Union-wide quantity of allowances). Þess má þó geta að tilskipun ESB 2023/959 hefur ekki verið tekin upp í EES samninginn þegar þetta er skrifað.Þessi heildarfjöldi losunarheimilda fyrir árið 2024 er birtur í ákvörðun ESB 2023/1575 en sú ákvörðun er hér til umfjöllunar. Í formála ákvörðunar 2023/1575, eru m.a. tilteknar eftirfarandi upplýsingar: Með ákvörðun ESB 2020/1722 var heildarfjöldi losunarheimilda, sem getið er í 9. gr. tilskipunar ESB 2003/87, ákveðinn fyrir árið 2021. Fjöldi losunarheimilda var þá 1 571 583 007 heimildir og notast var við lækkunarstuðul uppá 2,2 %, en sá stuðul gilti frá 2021. Með þessum lækkunarstuðli var heildarfjöldi losunarheimilda fyrir árið 2023, 1 485 575 977 heimildir. Á árinu 2024 verða breytingar á heildarfjölda losunarheimilda en þeim mun fækka um 90 milljón heimildir. Þó verður einnig bætt við 78,4 milljón losunarheimildum vegna sjóflutninga. Þessar breytingar eru settar fram í tilskipun ESB 2023/959, sem breytir tilskipun ESB 2003/87. Í tilskipun ESB 2023/959 eru einnig settar fram breytingar á línulegum lækkunarstuðli fyrir árin 2024-2027 en þá verður stuðulinn 4,3%. Líkt og greint er frá að ofan, þá hefur tilskipun ESB 2023/959 ekki verið tekin upp í EES samningin þegar þetta er skrifað. Heildarfjöldi losunarheimilda og fækkun þeirra í samræmi við línulegan lækkunarstuðul tekur til ríkja EES og EFTA ríkja.  Fjöldi losunarheimilda sem úthlutað verður til flugrekanda á árinu 2024 verður birtur sérstaklega, í samræmi við 3. gr. c tilskipunar ESB 2003/87, og er því ekki tekinn með í þeim heildafjölda losunarheimilda sem birtur er með ákvörðun ESB 2023/1575. Vert er að hafa í huga að 3. gr. c. tilskipunar ESB 2003/87 hefur breyst  með tilskipun 2023/958 en sú tilskipun hefur ekki verið tekin upp í EES samninginn þegar þetta er skrifað.  Ákvörðun ESB 2023/1575, sem er hér til umfjöllunar telur aðeins tvær greinar: Í 1. gr. ákvörðunarinnar er tiltekið að heildarfjöldi losunarheimilda, sem getið er í 9. gr. tilskipunar ESB 2003/87, skuli vera 1 386 051 745 fyrir árið 2024.Í 2. gr. ákvörðunarinnar er fjallað um gildistöku ákvörðunarinnar en hún hefur nú þegar tekið gildi í Evrópusambandinu. Eins og sjá má fækkar heildafjöldi losunarheimilda og þar með fækkar þeim losunarheimildum sem úthlutað er til aðildarríkja ESB og þá sömuleiðis til Íslands og annarra EES EFTA ríkja.